[poem=font="Simplified Arabic,4,black,normal,normal" bkcolor="" bkimage="" border="none,4,gray" type=2 line=200% align=center use=ex length=0 char="" num="0,black" filter=""]
ألف : أبحكي .. وكل همي قصيدة = وحروف شعري بالمشاعر شهيدة
وديار خلي عن دياري بعيدة = بيني وبينه .. صارت حدود وحدود !!
*
*
*
والباء : بريد الحب شيل الرساله = وأرمه .. على خلي لوحده .. لحاله
قلّه حبيبك كل هم(ن) طراله = صارت همومه ضده تزود .. وتزود !!
*
*
*
والتاء : ترى قلبي رفض يوم ينساه = يقول لو طال الزمن لازم ألقاه
ماأقدر أعيش بدون وصله ولاماه = والعمر مهما طال معدود معدود !!
*
*
*
والثاء : ثمر قلبي تساقط على القاع = ولا قلت له .. إنسى رفضني ولاطاع
يقول أنا .. ماأنساه لو هالعمر ضاع = دامه على بالي على طول موجود !!
*
*
*
والجيم : جيت الدار من بعد خلي = ولحظة رأيت الدار .. دمعي يهلي
ياكيف حبيب الروح راح متخلي = عني ولاهو .. راضي يرد ويعود !!
*
*
*
والحاء : حبيب القلب دايم على البال= تطري سنين الحب والقلب رحال
أنشد عن أخباره وانشد عن الحال = لكن حسافة ماتجي منه ردود !!
*
*
*
والخاء : خدمته في سنين المحبه=وفرشت له ورود المحبة بدربه
أبغى التقاعد .. وباقي العمر جنبه = ولانفع خدمة .. ولاعشت بورود !!
*
*
*
والدال : دموع العين تذرف حزينه = ياكيف راح الخل .. وكابر حنينه
وماعاد أدري وين قلبي و وينه =ليت الزمن في حظي الطيب .. يجود !!
*
*
*
والذاء : ذبحني في رحيله وأنا حي=نسى غرام القلب كنه .. ولاشيء
ياليته عن خافي الشوق يدري=يوم إني أسهر .. وكل من حولي رقود !!
*
*
*
والراء : رماني في سهامه حبيبي = أقفى .. وأنا بجروح قلبي .. عطيبي
ياكيف يقفي .. وهو يشوفن صويبي=والحال عقب العز .. ضايع ومهدود !!
*
*
*
والزاء : زينه .. مابعد شفت زيه=منهو يشوفه ينجبر .. بالتحيه
ويقول حي الزين هذا .. ياحيه=منهو حبيبه .. دايم العمر محسود !!
*
*
*
والسين : سلملي على الزين ياطير = قلّه حبيبك .. يذكرك دايم بخير
ويقول .. ماأنسى لو تطول المقادير = وتذودني عن صاحبي وصاحبي تذود !!
*
*
*
والشين : شفته في منامي وناديت = ولحظة لمسته .. قمت بالحال فزيت
ومن القهر من داخل القلب ونيت = حتى طريقي بوسط الأحلام مسدود !!
*
*
*
والصاد : صاحت بي قلوب العواذل=وأنا .. بحبه .. ماألوم وأجادل
ياليت بس يدرون حبه يعادل = كل ماعلى هالآرض من جبال ونفود !!
*
*
*
والضاد : ضيم الحب عانق فؤادي = وهو مع الأيام .. زاد العنادي
ينكر حبي له وينكر ودادي = وأنا على حبه لي أسرار وشهود !!
*
*
*
والطاء : طوال الليل .. ماأنام سهران = وهو يواصل غيبته مابعد .. بان
كنه .. يقول .. أنسى الذي بيننا كان = وأنا الذي قاطع مواثيق وعهود !!
*
*
*
والظاء : ظروف الوقت بالحيل تقسى=ولو قالوا .. أنسى قلت والله ماأنسى
سفينتي ماتقبل بأي .. مرسى=ياكيف أبنسى سيد البيض والسود !!
*
*
*
والعين : عمري راح وأنا .. بأنتظاره=أبغاه يتجمل .. ويرد الزيارة
ويشوف حالة خافقي وأنكساره = وياما على شانه .. تحملت منقود !!
*
*
*
والغين : غابت شمس الأفراح عني = وأنا على هالحال ماني متهني
ولاأنكره دامه غدى اليوم مني=حتى ولو هو سافر بلاد وحدود !!
*
*
*
والفاء : فمان الله لو راح كيفه=خلوه .. يطعني برمحه وسيفه
ولو تنزف جروحي ..ماأوقف نزيفه = عساه يذكرني بموتي .. وياكود !!
*
*
*
والقاف : قلت اللي مضى لأجل يدري = إنه حسافة .. ماعرف .. كل قدري
أقولها .. واقدم اليوم عذري =عساه يقدر ..عشرتي اليوم ياسعود !!
*
*
*
والكاف : كيفي .. لاتلومونني فيه = لو طالت الأيام .. أعزه .. وأغليه
الله يسقي كل درب مشى فيه=في كل خطوة في محادير وصعود !!
*
*
*
واللام : ليت الأماني يافؤادي على الكيف=وأجيب أنا .. زين الحسن والتواصيف
ويجي ربيع العمر .. ويغادر الصيف = وتهطل بي الأفراح .. ببروق ورعود !!
*
*
*
والميم : ماودي أنا يبعد .. بعيد = من حيث حبه في حشا قلبي يزيد
ويصير له .. مع مر الأيام تجديد = وأبقى أنتظر .. وأقول .. لابد بيعود !!
*
*
*
والنون : نية صاحبي وش وراها =وأنا .. الذي بمحبته .. أتباها
أنا اللي في حبه سنينه قضاها=وهو يجازيني .. بزلات وصدود !!
*
*
*
والهاء : هو يدري بحبي ويكابر = وأنا على هذا .. متحمل وصابر
ولو مرت الأيام .. صابر وناطر = ولو مرت الأيام .. بالقلب موجود !!
*
*
*
والواو : والله صاحبي لو نساني =ماأروح .. أبد .. ولا أتعدى مكاني
حتى ولو يقسى عليّ الزماني ,, والعمر .. مهما طال .. محدود .. محدود !!
*
*
*
والياء : ياسامع فصول الرواية = أبيك تدعي .. ياحبيبي .. معايه
عساه يرجع طب قلبي ودوايه=وتعود لي الأفراح .. ولقلبي يعود !!
[/poem]