شيخ لابـه شيـخ طاعـه ماهـو شيـخ انفتـاح

[حمد الدليهي]

قلدها وشاح


تشتعل نار القصايد وجزل الشعر فاح=مثل فوح العود لاسيق بوجيه الرجال
والمعاني ماتجنب وانا للشعر صاح=شاعر ٍ في لازمه مايجيب الا الجزال
يوم حلّت في مواجيبها والبرق لاح=سيلها مع كل يمه مع الوديان سال
اقبلت والمجد عنوان قلدها وشاح=نطقها في مدح غيره توقّفْ مايقال
ان سألتوا قلت هامة فخر عز ونجاح=راس مال ٍ مايعوّض بداله راس مال
في فهد عجران واسمه من اسماء الفلاح=الفهد والليث والحر وفحول الجمال
شيخ لابه شيخ طاعه ماهو شيخ انفتاح=شيخ حكمه شيخ واجب ويضرب به مثال
شيخ لاعدو شيوخ المكاسب والكفاح=شيّختْهْ ماهي لها شهور وايام وليال
قبل عجران القنينه ماجاته باانبطاح=ماخذاها في تباهي شبح والا ريال
شيخته على الصبيحات من وقت الرماح=قبله وبعده مجاله بها ماله مجال
شيخ لامن راح ماهو مثل من كل راح=حل صعبات المشاكل ماهي روح وتعال
كم سجين ٍ من مساعيه مطلوق السراح=كم فراق ٍ من مساعيه يرجع للوصال
ياجناح اللي من الضيم مكسور الجناح=يامحقق رغبة اللي له الرغبه محال
ياسلاح اللي على اعداه ماعنده سلاح=ياظلال اللي من الشمس مايلقى ظلال
يازلال وياصفا الجود ماعمره قراح=ياجبل شامخ وفارق عن احجام الجبال
شيخنا ومقدمتنا وحنا مانزاح=من جنوب وشرق من غرب والا من شمال
قلتها هذي حقيقه ماهي ضد وصياح =والقمر واضح بنوره ماهو نور الهلال