هـيـبـة كـلـيـب وصمـلّـتـه صـمـلـة الـزيــر

[حمد الدليهي]

قصييدة رثاء في الشيخ / فلاح الفارس رحمه الله شيخ الحسن من العماير من قبيلة بني خالد


خيّمت ياحزني وللحزن تبرير=اللي حداني يوم حزنت حادي
كل ٍ يموت وموت بعض العرب غير=فلاح موته غير ماهوب عادي
فلاح ماهو طير نقل الصقاقير=الطير كومة ريش ساق وثنادي
فلاح بن فارس فلاح المسايير=شيخ ٍ على كسابة الطيب زادي
شيخ ٍ تسلسل من شيوخ ٍ مشاهير=شيخ المكارم والليال الشدادي
يمناه تبذل تنفق وتعطي الخير=في وقت شحت فيه بعض الأيادي
المستحيله لابغاها تياسير=لوهي ورى سبع النجوم البعادي
ياكم سجين ٍ حكمه اوشك وتعزير=من بذل مجهوده تحقق وعادي
هيبة كليب وصملّته صملة الزير=عون الرفيق وضد سقم المعادي
ماهوب شيخ الا بعد شيخ وآمير=فعله وصيته بين حضر وبوادي
راح وبقى مثله شيوخ ٍ مناعير=حمد ابوماجد أصول وُمبادي
فلاح مات ومامعه مات تقدير=يبقى له التقدير مسك ٍ وكادي
ياجعل قبره سيل نو ٍ مزابير=سيل ٍ مجاريّه مع كل وادي
يسقيه ماينكف صبح ٍ ولاعصير ماينقطع عنّه هبوب البرادي
يالله عسى الفردوس مأواه ويصير=ويصير فيها يوم قسم العبادي