تكفون يا أهل الخفجي إستشارة عاجلة
 

بسم الله الرحمن الرحيم

قريبا سأنتقل للعمل في الكويت (العاصمة) وقد اتفقت مع عائلتي بالسكن في مدينة الخفجي والذهاب يوميا للكويت كون الايجارات في الكويت مرتفعة
وأيضا لدي أطفال يدرسون في مرحلة الابتدائي ولا أريد أن أغير منهج تدريسهم
علماً أن مدة عملي ستمتد إلى أربع سنوات تقريبا
فهل ستكون هناك عقبات
:)
تكفون أنتظر مشاركتكم وإسداء النصيحة

استفسار مهم
 

السلام عليكم ورحمة الله وبركاته

ياأخوان أبي أعرف المسافة بالضبط بين أقرب حي سكني في الخفجي ((وما هو اسمه)) ومنطقة الفيحاء في الكويت لأنه الموضوع يهمني كثير

اربع سنين بتمر بسرعه احسن لك تظل بالخفجي بدل ما يتغير منهج الدراسه على عيالك وراح تتعود على المشوار والله يوفق الجميع

في البداية مبروك الوظيفة وفالك التوفيق


سؤالك كان .. هل ستكون هناك عقبات ؟ . لا أعلم عن اي نوع من العقبات تتحدث ولكن دعني أتحدث بشكل عام وانت اختر ماشت لأنني فهمت من حديثك بأنك لست من سكان محافظة الخفجي ..

في البداية اقول محافظة الخفجي محافظة صغيرة جدا" وستلاحظ بأن هناك العديد من سكانها هم موظفين شركات مثلي ومثلك بعضهم يعمل في الخفجي وبعضهم في الكويت وهم كثيرين جدا" وستلاحظهم مع الايام وربما تكون صداقه طيبة معهم لك وللاهل .


بالنسبة للسكن في الخفجي والاسعار .. أسعار الشقق كما أعلم من 12 ألف وانت طالع على حسب النظافة والحجم .أما عن اقرب حي للمنفذ أقول بشكل العام الخفجي كلها قريبه للمنفذ مساله خمس او عشر دقايق بالكثير لكن الاقرب اعتقد هو يسمونه حي الكيلو وهو حي الشمامره على حسب مااسمع هنا .

بالنسبة للمدارس في اهليه وفيه حكومية انت ورغبتك لكن ماعندي فكرة عن اسعار المدارس الاهلية .

بالنسبة للمشافي فيه مستشفى واحد حكومي سئ وفيه مشافي خاصة عبارة عن مستشفى واحد اسمه الخفجي الاهلي وعدد من المستوصفات لكن بشكل عام المشافي في الخفجي سيئة ..موظفين الشركات في الخفجي جميعهم يتعالجون في الكويت لايزورون مشافي الخفجي الا في حالة طارئة يستصعب فيها الوصول للكويت .

المراكز الترفيهية في الخفجي .. بشكل عام فيه الكورنيش ( جزء منه مرتب وجزء سيئ ) وفي مول صغير انشئته شركة ارامكوا داخل الحي السكني التابع لموظفينها وهو حي مفتوح للجميع وفيه مول ومجموعة مدارس بحي الخليج .. المول صغير لكنه امن ونظيف جدا" يعني لو تنزل اهلك فيه وتطلع الكويت ماعندك مشكلة لاتخاف عليهم عندهم اللي يحتاجونه من مطعم وصالة ترفيه ودورات مياه والمول امان في سكرتيه ..و فيه صالة مغامرات فيها لعب خفيفه للأطفال وفيه كوفي شوب حلو ونظيف يعني الاطفال يلعبون وانت تتقهوى بالكوفي مع المدام الله يحفظكم جميع .

فيه حديقة صغيرة مكانها مقابل البلدية الدخول اليها مجاني فيها لعب خفيفه جدا" في الفناء الخارجي وفيها شبك صغير فيه مجموعه من الحيوانات الخفيفه لكن شبك الحيوانات الدخول له اعتقد ب 3 ريالات .

بالنسبه للحريم فيه يسمونه القرية النسائية وهذا مكان ترفيهي على الكورنيش الدخول فيه للنساء فقط .



أما عن الكويت .. الفيحاء وحسب اعتقادي تبعد يمكن 100 كيلو من أول ماتدخل الكويت بعد المنفذ الكويتي يعني كمسافة هي قريبة لكن فيه شغلة ضرورية جدا" وهي ان فيه كثير من سكان الخفجي هم موظفين بشركة شيفرون في الكويت وفيه ايضا من سكان الخفجي يعملون مع مقاولين بنفس الشركة اضافه الى انه ايضا" فيه سعوديات يعملن مدرسات بالكويت وهن كثيرات جدا".. معنى كلامي هذا انك لازم تطلع قبل وقت دوامك بساعتين على الاقل عشان زحمة المنفذ لأن لو تأخرت ماراح تقدر تطلع من زحمة المدرسات .. وفيه فخ انته لايصيدك !! بالمنفذ خاصة الجوازات سواء السعودي او الكويتي انحش عن السيارة اللي فيها مدرسات سواء كانت باص او سائق خاص او جمس او ايا" كانت لاتوقف وراها ههههههههههاي لأن المدرسات السيارة الوحدة تحتاج تختيم جوازات ربع ساعة وعليك الحساب خخخخخ .

بالجوازات السعودي الله يعينك على الزحمة لكن لو عملت مثل ماقلت لك ماراح تتاخر على دوامك اما الجوازات الكويتي راح تلاحظ ان فيه طابور سيارات خاصه اغلبها جيوب او وانيتات دور الطابور هذا ووقف وراه هههههههه هؤلاء موظفين الشركات حتى لو كان طابورهم طويل لاتشيل هم راح يمشي كله بعشر دقايق بس !! لأن فيه بطايق خاصة لموظفين الشركات بس يختم ويمشي بسرعة البرق مو مثل المدرسات الله يصلحهن على الزحمه ههههههههاي .


بالنسبة لبنزين السيارة لاتعبئ من الكويت عبئ من السعوديه لأن بنزينهم غالي وراح تلاحظ الكويتيين يعبون من المحطات اللي عند المنفذ .


الحين وقت امطار وخيرات عشان كذا فيه مخيمات منتشرة على جوانب الطريق بالخفجي لليجار اليومي في الزين وفيه الشين وايجار يومي تقدر بالويكند تاخذ مخيم تغير فيه جو انت والاهل والاولاد يلعبون بالبر ( عادة المخيم يكون فيه كهرب وتلفزين ولمبات وحمام وحطب ) شغل مرتب والمخيمات تختلف ..


هذي ياغالي معلومات بشكل عام اجتهدت في طرحها لعلك تستفيد منها شي ولو قليل لأنك لم تحدد اي العقبات تقصد واجتهدت باعطائك فكرة عامه .. أتمنى ان اكون افدتك ولو بالقليل

وان اردت اي استفسار لاحقا" اطرحه هنا او في موضوع جديد لكي انتبه له واجيبك مباشرة باذن الله

شكرا من القلب لأخي شاب طموح
 

بسم الله الرحمن الرحيم
أخوي الكريم شاب طموح

الله يبيض وجهك كفيت ووفيت
بس عندي سؤال
بالنسبة لي فأنا أحمل جواز دبلوماسي أنا وعائلتي
فهل يفرق معي ذلك في المنفذ

وإذا كان عند معلومات عن أفضل حي في الخفجي من ناحية الأمان وتوفر المرافق خاصة المدارس الابتدائية الحكومية

الله يعطيك العافية على المعلومات حيث أنني لم أزر الخفجي مطلقاً وليس لدي علم بها لكن أحس أني حبيتها من كثر كلام الناس عنها.

حياك ياغالي واعتذر في البداية عن ردي المتأخر


بالنسبة للمنفذ ولايهمك راح أسأل لك الموظفين في الجوازات والجمرك في الجانب السعودي والكويتي . راح اسالهم بكرة الصبح وارد لك خبر هنا بكرة الصبح باذن الله .


أما بالنسبة للامان فهذي خذها مني الخفجي كلها سوى ماراح تفرق معاك واعطيك مثالين بسيطين :
الاول : قريب لي يسكن بجوار أحد المراكز الامنية بالخفجي ومع ذلك تعرض بيته للاقتحام والسرقه !!! .
الثاني : قبل شهرين تقريبا" وصل عدد السيارات المسروقه في مختلف الخفجي الى 15 سيارة على حسب ماسمعت !!

فلا تشيل هم الامان الدعوى سايبه هههههههه


تحياتي

أنتظر ردك أخوي شاب طموح
ولك مني في ظهر الغيب دعوة

أخوي أنا أقول لو تسكن بالكيلو 8
اقرب لك للكويت حذفت عصى الأ انت واصل جمرك الكويتي لو بتسكن بالغربية أو المحدود أو التملك راح تطفش من المشوار كل يوم ........

بنسبه لسكن اخوي مناحية المدارس حي المرور اوعشيرق موقع استراتجي

شكرا لكم جميعا على مروركم

أخوي (عشقي الهلال) هل حي الكيلو8 متوفر فيه الخدمات أقصد من ناحية المدارس خاصة الابتدائية الحكومية والمرافق الأخرى وشكرا على مرورك

مرحبا
صباح الخير على الجميع

بخصوص المنافذ .. سألت لك موظف في المنفذ السعودي بالجمرك وقال لي ان الكبينة حقت موظفين الشركة هي بالاصل للديبلوماسيين ولكن لأن موظفين الشركة كثيرين جدا" فهم يفتحونها لهم لكن يقول لي الموظف اذا جيت وشفت فيه زحمة وقف بأي مكان جنب الكبينة على جنب وانزل للكبينة اختم وامش لاتوقف بالزحمة وسألته عن الجواات قال نفس الشي ينطبق على الجوازات اذا لقيتها زحمة وقف على جنب وانزل اختم وامش .. سألت لك بالمنفذ السعودي واعتقد الكويتي نفس الشي ..


أتمنى أكون افدتك ومعليش ع التأخير وتمنياتي لك بالتوفيق

الله يسعدك وين ما رحت أخوي شاب طموح
ماقصرت كفيت ووفيت

معليش لو كثرت أسئلة عليك الله يحفظك
أخوي لو كان دوام يبدأ الساعة التاسعة صباحا فما هو أفضل وقت للخروج تلافياً لزحام المنفذ

كما أرجو إفادتي عن دوام الشركات اللي تسبب زحمة في المنفذ متى يبدأ ومتى ينتهي

وشكرا لك من القلب

أخوي فيه توصيل مجانا من الحكومة لتوصيل الطالبات لمنازلهم وهذا يشمل ابتدائي ومتوسط وثانوي .... بس ما اعتقد أن فيه للطلاب بس تقدر تسئل مدير المدرسة وتتأكد ..
كل الي أعرفهم مسجلين عيالهم خاص ...
:smile:

حياك ياغالي

في البداية شكرا" لدعائك ولك بالمثل وتمنياتي لك بالتوفيق وأهلا" بأسئلتك واستفساراتك في أي وقت :smile:

قبل لا أجيب على استفساراتك أحب أقولك شغله من باب الفائدة ، البارح بالليل كنت في الكويت - العاصمة - نفس المكان اللي فيه عملك وهو الفيحاء فما أدري ايش اللي جابك على بالي وانا رايح بالطريق فقلت خلني احسب المسافة عشان اقول للرجال هههههههه قلت يمكن تكون بحاجة لها كونك جديد على المنطقه :wink: تحتاج من تدخل الكويت مع المنفذ ساعة وعشر دقايق بس عشان تكون بالعاصمة بسرعة 120 كيلو فقط !! يعني لو داعس تاصل بوقت اقل . لاحظ اني حسبت لك الوقت من تدخل الكويت مع المنفذ مو من الخفجي !؟ لأن المنافذ على حسب وقت مشيتك يمكن تقعد بهن ربع ساعه ويمكن ثلاث ساعات !

نرجع لاستفساراتك :
بخصوص أفظل وقت لدوامك بما انه يبدأ تسعه فــ أقول بشكل عام أنا لو كنت مكانك راح اخلي لي وقت زيادة احتياط لأي ظرف ( زحمة منفذ - تعطل - زحمة الطريق بالكويت ) فعشان كذا أنا اقترح انك تطلع من بيتك 6:45 دقيقة .. وتكون الحسبة كالتالي نص ساعه هذي للمنفذين وهما غالبا" يكون فاظين بالوقت هذا وساعة ونص هذي للطريق من تدخل الكويت الى مقر عملك .. طبعا" بنائا" على الحسبة راح تاصل مقر عملك قبل وقت الدوام بنص ساعة غالبا" لكن مثل ماقلت لك الاحتياط واجب وركز على هالشي خصوصا" انك اعتقد اول مره تجي الكويت يمكن تضيع الطريق :eek:

أما عن دوام الشركات وزحمة المنفذ فــ اذا كنت طالع من الخفجي فتقريبا" من 6:10 الصبح تبدأ الزحمة غالبا" ( موظفين الشركات والمقاولين والمدرسات الله يهديهن على الزحمة yx.020) وتنتهي الزحمة تقريبا" على الساعه 6:50 الى سبعه بالكثير << اللي جاي متأخر ههههه . يعني سبعه يكون المنفذ اشطه على قولة المصريين :biggrin:

أما اذا كنت جاي من الكويت ففيه توقيتين للزحمة بشكل عام ، بالنسبة للموظفين غالبا" زحمتهم تبدأ من 2:30 الى ثلاثه ونص ( غالبا" ) خصوصا" الساعه ثلاثة وربع مانصحك تجي الخفجي ابد لأنك راح تعلق بالزحمة - غالبا" - .
أما المدرسات الله يصلحهن فيعملن زحمة بدري تقريبا" ولأن مدارسهن مختلفة فبعضهن يبدرن يجن قبل الثنتين لكن الاغلب على الثنتين ..
فصلت لك الاوقات بالتفصيل عشان تعرف ايش اللي صاير وتكون بالصورة :wink: لكن بشكل عام من الثنين الى ثلاثه ونص الزحمة وارجع اقولك موظفين الميناء يعملون زحمة الساعه ثلاثة وربع .



ملاحظة صغيرونه : اقدر اجاوب على استفساراتك بشكل عام واختصر المسألة علي وعليك لكني مااحب هالنوع خصوصا" مع واحد جديد على المنطقه ، فظلت اني اعطيك البيانات بالتفصيل عشان تفهم الوضع هنا وبعدين انت تقرر من نفسك .


اعتذر مره اخرى ياغالي على تأخري بالرد لكن مثل مانت شايف حايسين الله المستعان بين الخفجي والكويت .. على فكرة اذا بغيت تروح العاصمة هاليومين _ يعني قريب- لاتروح مع طريق - الملك عبدالعزيز - لأن كلاه السيل وقفلوه ما ادري الحين فتحوه او لا لكن البارح واقفه عليه دوريات فعشان كذا رح مع طريق - الملك فهد - ترتاح نفسيا" وتاصل بدري باذن الله .

تحياتي وتمنياتي لك بالتوفيق ( اذا بغيت تاخذ معاك المدام فـ اطلع بدري بربع ساعة احتياط لو يكون مطابق الحريم زحمة )

السلام عليكم
أخوي شاب طموح صراحة لساني عاجز جدا عن شكرك
ماأدري أتكلم على سعة صدرك أو أتكلم على تفصيلك الرائع جدا للموضوع
صراحة هنيئا للموقع بوجود شخص مثلك
والله يارب إن يستر عليك في الدنيا والآخرة
ويوفقك وين ماكنت وين ما رحت
أستودعك الله ياغالي.

مساء الخير

بارك الله فيك على دعائك ولك بالمثل ياغالي . شكرا" على اطرائك اللذي لا استحقه ..

أتمنى لك وللجميع التوفيق :101: