مراهقون يشوهون كورنيش الخفجي
 

اليوم الإلكتروني

www.alyaum.com

الأربعاء 1428-07-11هـ الموافق 2007-07-25م العدد 12458 السنة الأربعون



--------------------------------------------------------------------------------

اليوم السعودي

مراهقون يشوهون كورنيش الخفجي

عادل العنقري - الخفجي

بالرغم من الميزانيات الضخمة التي أقرتها الحكومة الرشيدة لتجميل الطرق البحرية في محافظة الخفجي إلا أن تصرفات بعض المراهقين شوهت جمال الكورنيش الواقع على الخليج العربي ومع اهتمام بلدية المحافظة والسعي للانتهاء من المراحل الأخيرة لاستكمال تشييد بقية المرافق للكورنيش الذي يمتد الى نحو 10 كيلو مترات باتجاه الشريط الحدودي للكويت تظهر بعض التصرفات الغريبة للبعض كقيادة السيارة فوق ممر المشاة وسط غياب الجهات الرقابية والكتابة على جدران دورات المياه بل وصل الأمر لتكسير صنابير المياه مما اضطر الجهات المعنية لغلق مصدر المياه حتى تعاد صيانتها من جديد الأمر الذي ادى لمعاناة حقيقية لبقية المواطنين وكانت بلدية الخفجي قد انتهت من صيانة ممر خاص لهواة المشي وتشييد مسجد وتنسيق بعض الحدائق المحاذية للبحر بالاضافة الى اماكن مخصصة للعب الأطفال ومظلات لجلوس العوائل واصدرت تصاريح لإقامة مشاريع استثمارية كالمطاعم ومراكز للترفيه وكانت «اليوم» قد اشارت الى مطالبة المواطنين والمصطافين بضرورة تواجد الجهات الامنية بكثافة للحد من العديد من المشاكل.
من جهة اخرى بدأت بلدية الخفجي في تكملة مشاريع السفلتة في شوارع الاحياء الشمالية وتسمية الشوراع والاحياء وتظل معاناة المواطنين والمقيمين في بطء المقاول المنفذ للانتهاء من مشروع الصرف الصحي وتخفيض منسوب المياه في الأجزاء الغربية من المحافظة الى جانب بقاء بعض الشوارع دون اعادة سفلتتها بعد الانتهاء من المراحل الاولى.

لا حول و لا قوة الا بالله ... وللاسف ان التخريب طال الكورنيش و غيره .. لا وازع دينى .. ولا وازع اخلاقى .. ولا جهه رقابيه تعاقب و تخالف. اما بالنسبه لتكسير ممرات المشى فظلم ان نظلم المراهقين بس .. حتى اولياء امور المراهقين ما قصرو .. اللى يمشى بهالممشى يشوف ان كثير ممن يقومون بهالمخالفات هم ارباب اسر المفروض انهم مسئولين .. وللاسف الجهل والامبالاة و حب الذات ما يردعها شى غير "المخالفه الماليه".

السلام عليكم ورحمة الله وبركاته

مشكور اخي مشرف خبار الخفجي على نقل الموضوع

ولكن لا نلوم المرهقين فقط على العبث في الكورنيش وفيه كم سؤال يطرح نفسه

هل المراهقين يذهبون للكونيش مع الاهل ؟؟!!

هل المراهقين بالخفجي فقط ؟؟!!

هل المسؤال عن الكورنيش المراهقين ؟؟!!

ليش كورنيش الخبر والدمام مافيه مراهقين ؟؟ !!

انا اخبركم من المسئولين عن خراب الكوونيش والمرافق العامه

اولا: احنا نعم الى مايربي ابناءه علي الصح من الخطا هو السبب تلقى رب الاسرة طق بلوت

بالاستراحه والام طق حنك مع الجارات والابناء الله اعلم وينهم !!

ثانيا : البلديه ماتجي كورنيش الخفجي الا من سنه لسنه وين الصيانه الدوريه للمرافق والدليل الخبر

والدمام عمال النظافة والصيانه دوام اخر ليل ماهم مثل عمال ابو عرب !!

ثالثا : ياجماعة لا نطبل للصحافة لو كل مواطن حط نفسه هو المسؤل تغير الوضع بس للأسف ( ماخذين مابدى طنش تعش )

دمتم بود

[align=center]بسم الله الرحمن الرحيم[/align]السلام عليكم ورحمة الله وبركاته....اما بعد.:
والله ياخوان اعتقد ان السبب وراء ذلك متابعة الافلام ...
فهم يرون ان الشعب الاميركي يفسدون في مناطقهم
والشعب السعودي يقلدهم ...ليرون ان الشعب السعودي اكثر فسادا وهو في الوقاع افضل شعب ظهر على تاريخ الامه..

هلا وغلا اخوي

يعطيك العافيه على الموضوع الجديد وايضاا اهتمااامك بالخفجي وعلى المراهقين

ونتمنى منك المزيد من الاخبار الجديده عن اهالي الخفجي

ولا تبخل علينااااا


وتقبل مروري

اخوك: الباكستاني

مشكورين كلكم والتربيه
هي المشكله مافيه ابو ولاام لاحول الله

اي والله فعلا هذاك اليوم انا ابي اتوضا ما حصلت ماي اتوضا فيه ,,,

وغير هذا اني شفت اكثر من سياره فوق الرصيف وعذره ان مابي احد يشوف اهلي !! ياخوي من يم اهلك ,,,

غير الايميلات اللي على كل جدار ,,,

و اللعب على المسطحات حسبي الله عليهم كل يوم طاقين شيشتي ومطيحين الفحم وهذي حالتي بس اولع :"( ,,,


اشكر حرصك اخوي الله يكثر من امثالك ,,,




اخوكم : مـــــحـــــمـــــد

مراهقين



مافيه رقابه



من المسؤول ؟؟







كل هلكلام مامنه فايده من وجهة نظري
لو توصل الردود للمليون



كل من جاء قال مراهقين ولا ولا الخ.............


بدال هلكلام كله لو تتوصلون الى نتجيه احسن شوفوا مكان للشباب
نبي مكان مو اكثر صدقوني واحد يكفينا


اذا رحنا نتمشا ماسلمنا من الدوريات
اذا تمشينا بالكرنيش الله يعطيهم العافيه الهيئه قالوا روحوا بعد موجهه ( يعني نتمشى على الخط مع السيارات )
اذا رحنا الى خط الكويت اول مايوقفونك رجال المكافحه ونفظ الله لا يوريك
اذا .........................الخ
اذا .........................الخ


زبدة الكلام ان كل شي اذا مو منوع يصير ممنوع
ابي مكان واحد يقولون للشباب استانسوا فيه

صحيح بغيت اظم شغله ماقلتها
الكفي اللي حاطينه لنا عند مدينة الخفجي الترفيهية النسائيه ( بيت الشعر اللي وراء )
هذا حاجه للشباب بس
بس ياليت تمرونها وتشوفون الاسعار كلها دبل في دبل

يعني مالك الى انك تصير نفسيه وماتطلع من البيت لان كل مكان ماهو لك يابو الشباب
بختصار شديد اللي ابي اوصله ( نبي نستانس وين نروح ..؟؟؟؟؟؟ )


ملاحظه :
ترى كلامي مايعني اني راضي باللي يسونه الشباب في الكرنيش لاكن ودي انكم توصلون للحل لهم
مو كل من جاء قال مراهق ومشاء يعني نصلح الغلط بغلط اكبر منه ونخلي كل واحد في حاله
وعلى قولتهم ( طنش تعش تنتعش ) ( مراهقين ) (مافيه رقابه)( من المسؤول )


تحياتي لوني طولت شوي عليكم

مافيها شي اخوي حاول توجد لنفسك بديل ,,,

شوفلك هوايه تحبها او اي شي لما الله يفرجها ,,,

الفراغ مشكله ترى لا تحاول تخلي نفسك فاضي ,,,


اخوكم : مـــــحـــــمـــــد

الله المستعان هذي مشكلة الآباء وليس الأبناء
فلنربي آبناءنا على حسن الخلق والنظافة العامة في البدن والملبس والمسكن والبيئة المحيطة بنا

اخوي
sick_love

اشغل نفسي بايش يعني


ياليت توضح وقبل كل شي لو انت في مكان اي واحد من هشباب بصراحه راح ترضى تشغل نفسك بالشغله اللي انت راح تقولها



اخوي اخلاق
هذي ماهي مشكلة الاباء
اتحداك تلقى واحد ابوه قايله اكتب على الجدار ولا على ....... الخ


هذي مشكله سببها الفراغ مال اهله فيها شغل
يعني تبي ابوه يمسكه ويلبسه برقع ويجلسه مع خواته يصير الولد عاقل ومتربي ترى كل هذا
غلط في غلط الولد لازم يطلع ويعيش على شان يتعلم من الناس اللي حوله


تحياتي

كلاااام عين العقل ’’’

الله المستعااان ’’’

انا ما اتخيل اني مكان احد ,,,


انا فعلا من هالشباب و عايش اللهم لك الحمد و مستانس لا كتبت على جدار ولا فحطت بس هنا مشكلتهم الشعبيه يعني مثلا انا والله بفحط وبفر علشان الناس يقولون بو فلان يفحط شتبي من واحد هذا تفكيره ؟؟ ,,,

في اشياء كثيره ممكن الواحد يستفيد بوقته منها غير هالاشياء اللي تضر ماتفيد ,,,

بعدين الانسان المفروض هو اللي يكيف نفسه مع البيئه اللي هو فيها علشان يرتاح ,,,


اخوكم : مـــــحـــــمـــــد

اخوي / سيك لوفي

بعد التحيه


الكتابه على الجدران مالها مبرر واحد لاكن نرجع ونقول كله من الفضاوه اللي عنده

وبعدين الناس فيهم
انطوائي
اجتماعي
عاقل
مجنون
والناس اجناس


الناس اجناس


انا اعرف ناس تجلس بالاربع والخمس ساعات بالمقهى من قلت السنع
تقوله ياخي طفشنا خلنا نطلع يقولك وين .... شي طبيعي تقوله مدري بس نبي نغير جو



بصراحه اخوي
اللي ودي اوصله للمسؤولين خاصه بالخفجي من ( تجار + ناس له كلمه + ناس واصله + ناس مقربه)

نبي اماكن زين الناس
نبي صالات العاب متكامله ( بلياردوا _ انتر نت _ تنس طاوله _ بلاي ستيشن _ كفي ......الخ )
نبي مدامنا على البحر ( مدينة العاب مائيه )
نبي الارض اللي مقابل مطعم سهار اللي بالكنيش يخلونها ( مزروع + ملاعب كوره + ملاعب طائره + ملاعب سله )


فيه مية شغله وشغله بس وين اللي يعطينا وجه




تحياتي
مهستر

نبي مدامنا على البحر ( مدينة العاب مائيه )
نبي الارض اللي مقابل مطعم سهار اللي بالكنيش يخلونها ( مزروع + ملاعب كوره + ملاعب طائره + ملاعب سله )

هذي انا معاك فيها لان فعلا هالكلام صحيح ,,,

بس بلياردو وانترنت وتنس طاوله كله موجود ,,,

و في على فكره عندنا ملاعب مثل ملعب الشركه وملعب نادي العلمين مزروعين مافيهم شي ,,,

وسالفة المدينه المائيه هذي مطوله صدقني ,,,


اشكر حرصك ,,,


اخوكم : مـــــحـــــمـــــد

موجوده بس وين صالة اليامي ولا الشركه

اللي ابي اوصله تصك بدري وانا اخوك

والملاعب اللي تتكلم عنها اقدر العب الساعه 12 بالليل
شوف الجبيل عندهم ملاعب على الكرنيش سله ومادري وش معها تحديدا والشباب هناك للفجر




على العموم يعطيك العافيه خيووووو

عموما ان شاء الله رسالتك توصل ,,,

ولو ان الرسول صلى الله عليه وسلم كان يكره الجلوس بعد صلاة العشاء يعني النوم بدري افضل ,,,


اخوكم : مـــــحـــــمـــــد

ظاهرة التخلف موجوده وبكثره

في محافظة الخفجي

نرجو من الدوريات تكثيف الرقابه على مثل هذه المناطق

والذي يقبض عليه يحول للمحكمه ويحاكم

يسجن أقل شي ثلاث أشهر مع الغرامه الماليه

يا خي شباب الخفجي بيظلون يسون كذا الى بكررررره

وش المانع انك تحط دورية ثابته في الكورنيش وخلاص ..

والله ناس يبون الخفجي تتطور ويبون امارة منطقة الشرقية ترتب الخفجي وهم جالسين يخربون


العااالمي

المفروض الكرونيش يكون مزحوم بالشرطه وراح تنقلب السلبيات الى ايجابيات

انا من وجهت نظري الابا والامهات مالهم اي ذنب في هذا الموضوع . مافيه والد يحب ان عياله يصيرون داجين مشردين في شوارعها وسون هبل في الاماكن العامه مثل الكورنيش بس شبابنا في شكل عام خربا الله يصلحهم ويهديهم ............................


وسامحونا اذا شفتوا مني خطا


ودمتم بحفظه

الله يعطيك العافيه اخوى على الموضوع الهام

بالنسبه لشبابنا مع الأسف تشوفهم رجال وهم فى عقولهم اطفال بل الطفل يحافض على لعبته

انا فى وجهة نظرى المسئول فى ذلك>> البلدية <<< بالعربى هاذى شغلتهم الحفاض على المحافظه

انا اللى اعرفه ان فى مكاتب للبلديه عند دوار الكورنيش هم المراقبين على حفاض الكورنيش

بس مع الأسف دائما مغفله << الظاهر الشباب شخرى بسابع نومه << مع الأسف

يعنى اللى اعرفه دام الرواتب ماشيه ليش اشغل نفسى بالأمور هاذى << هذا اللى اشوفه انا للموضفين

المفروض من مدير شرطة الخفجى أن يصدر غرار تثبيت دوريه ثابته بالكورنيش

لأجل الشباب المنحرفين <<< ياعينى من كثر الدوريات بالخفجى كلها دوريتين

والله الكثير من الأمور التى تتعبنا بس شنو بنقول لا حول ولا قوه الا بالله

تحياتى للجميع....

اخوكم
عاااااشق الخبر

وصلت رسالتك أخوي مهستر

بس اللي أتمناه منك أنك تكتب لي بعض الأفكاراللي تشوف انها فيها فائده ونافعه بنفس الوقت , وان شاالله نقدر نوصلها بطريقتنا

, طبعا ماأوعدك بشيء ,لكن بحاول .... والله المستعان