قصيدة رثاء في جهز عوض المطيري
 

قصيدة رثاء في جهز عوض المطيري رئيس بلدية سلوى اثر حادث على طريق ابرق الكبريت الخفجي يوم الجمعة
7 - 6-1439هـ

مات رجالٍ ماهو عندي رخيص
له علي معروف ماانساه وجميل
في جهز حزني غدى حزنٍ خليص
وانتثر دمعي وصدقت الرحيل
حجم الارض اصبح كبر كُم القميص
من خبر موته على نشره دليل
سيرته خضراء ماهي سيرة بحيص
ليت عمره صار بالدنيا طويل
كامل الفزعات مايفزع نقيص
مايعوض فيه من حط ويشيل
حرٍ ينومس صقاقير القنيص
نادرٍ ماله مع العالم مثيل
نبع جوده يشبه إلْحوض الخريص
ياعسى الفردوس مثواه البديل