منتديات الرائدية - مدرسّ عبرود تحرقه جمرة الرسول ( عليه الصلاة والسلام )

[align=center]

بسم الله الرحمن الرحيم

السلام عليكم ورحمة الله وبركاته

أما بعد

أعتذر على كتابة الموضوع باللغة العامية لأني بصراحه ما أعرف أكتبه بافصحى

طبعاً أكثركم يعرف بأني كنت من مواليد وسكان مدينة جدة حيث تربيت وتعلمت في مدارسها من المرحلة الأبتدائية حتى المرحلة الثانوية وكان والدي حفظه الله يعمل في الخطوط الجوية السعودية في مطار الملك عبدالعزيز وبعد تقاعده من العمل في عام 1426هـ أنتقلت مع والدي ومع جميع أفراد العائلة إلى مدينة الرياض

المهم

بعد سنه تقريباً أتصل على جوالي واحد من زملاء الدراسة سابقاً وهو ولد جيرننا في مدنية جده

قال لي : هلا بـ عبرود كيف الحال
قلت له : الحمد لله بخير
قال لي : بصراحه أنا تخرجت من كلية المعلمين وطلع التعيين حقي في مدنية الرياض وفي ثانوية الفاروق بحي الربوة ودي أننا نتقابل ونشوف أخبارك وعلومك وابيك تدلني على شوارع الرياض

قلت له : الحمد لله على السلام وحياك الله بكرا انت ومن يعز عليك على الغدا عندي في البيت

المهم

لما جاني البيت وبعد ما خلصنا الغداء وشربنا الشاهي بدأت سواليف الذكريات عن الدراسه وعن القصص المواقف اللي صارت لنا عن أيام الدراسة

قلت له : سبحان الله الحين صرت مدرس وصرت زميل للمدرسين اللي درسونا في السابق

قال لي : تبي الصراحه ياعبرود جالس أفكر لما انتقل لجده وشلون بتكون علاقتي معهم يعني تخيل اول كنت طالب عندهم والحين صرت زميلهم

قلت له : تخيل تدرس في متوسطة الأمام فيصل عاد تصير زميل الاستاذ فلان مدرس مادة الرياضيات

طبعاً مدرس الرياضيات هذا كان من اشد المدرسين اللي درست عندهم في حياتي الدراسية وكانت شخصية قويه مررره لدرجة انه إذا ضرب الجرس الخاص بالمادة حقته تشوف الفصل كله هدوء وانضباط وبصراحه أنا أنضربت منه ثلاث مرات فلكه برجولي الله يكرمكم وكان مطوع ويخاف الله وكان قبل ما يبدأ بالدرس يجلس يقولنا عن حديث أو عن آية في القرأن أو عن دعاء نقوله أو عن أي شي في أمور الدين وكان يتبع حديث الرسول صلى الله عليه وسلم اللي يقول فيه (بلغو عني ولو بأية) وبيني وبينكم انا في أشياء أقولها في الصلاة وبعض الأدعية تعلمتها بفضل الله ثم بفضله الله يذكره بالخير

وهذي الأشياء تنحسب في موازين حسناته بإذن الله

المهم

لما قلت لخويي تخيل تصير زميل الاستاذ فلان مدرس مادة الرياضيات

قال لي : انت ما دريت وش صار على الاستاذ فلان

قلت له : تكفى لا تقولي انه مات

قال لي : ياليت كان اهون

قلت له : اجل وش صار فيه ؟

قال لي : انتكس وحلق لحيته وصار يتسمع أغاني وراعي استهبال وعربجي

بعدها والله العظيم ثم والله العظيم أن دموعي بغت تنزل من القهر

قلت له : افااااا ليش كذا ؟

قال لي : والله مدري انا رحت ازور المدرسين في المتوسطه ولما شفته انصدمت ضاق صدري

المهم

بعد ما راح خويي من عندي جلست افكر بيني وبين نفسي في المدرّس هذا وقول في نفسي وش اللي خلاه ينتكس ويحلق لحيته ويصير له كل هذا ؟

بعدها تذكرت حديث الرسول صلى الله عليه وسلم اللي يقول فيه

(سيأتي زمان على أمتي القابض فيه على دينه كالقابض على جمرة من النار)
وسبحان الله حسيت بأن المدرس هذا حرقته الجمرة اللي قال عنها الرسول صلى الله عليه وسلم

بس وش الأسباب اللي خلته يحس بحرارة الجمره هذي بعد كل هذه المدة يعني تخيلو انا اعرف المدرس هذا من عام 1990 ميلادي وكان عمره على ما اعتقد اكثر من 35سنة وكان من الملتزمين ومن المحافظين على سنة الرسول صلى الله عليه وسلم

المهم

بعد تفكير لمدة طويله وجدت السبب الرئيسي كثرة الفتن وكثرة المعاصي اللي تصير في هذا الزمن

وسبحان الله الحين لما يلتزم الأنسان ويجلس عند اخوياه في المجلس يجلسون يستهبلون عليه ويسولفون معه بالكلام القذر والقبيح عن جمال المعاصي وعن محاسن النساء وعن الأغاني وعن المسلسلات وعن أيام المراهقة وفي بعض منهم يتهرب من الأنسان الملتزم ويصرّّفه ويتضايق لما يشوفه

وبعدها الملتزم لما يروح ويكون على انفراد يجلس يفكر بينه وبين نفسه عن اللي صار له في هذا اليوم مع اصدقائه يجلس يتضايق ويجي الشيطان ويوسوس في عقله
ويقول له : ها وش استفدت من الالتزام شف الحين كل الأخوياك صارو يتهربون منك ويتضايقون منك لذى نصيحه ارجع مثل ما كنت وأن شاء الله بعدين تلتزم قبل ما تموت

وبعدها ينتكس الشخص ويرجع مثل ما كان والعن

طبعاً فيه ناس بتقول ليش الملتزم والمطوع يجلس عند الناس هذي وليش ما يبعد عنهم ويفتك من شرهم

عاد أنا أرد عليهم وقول لهم فيه حديث للرسول صلى الله عليه وسلم يقول فيه
( إن المؤمن الذي يخالط الناس ويصبر على إذاهم خيرٌ من الذي لا يخالطهم ولا يصبر على أذاهم )

لذى يا ناس أتقو الله فيما انتم فيه من معاصي وفتن فوالله العظيم انتم تعملون بأشياء تضر بغيركم ومن ضمن الاشياء هذي سماع الاغاني بصوت عالي وفعل المعاصي والمجاهره بها أمام الناس فهذه الاشياء تأثر على غيركم

وبصراحه مع احترامي الشديد لبعض الاعضاء من النساء هداهم الله في بعض المنتديات يعرضون صور بعض الحريم أو بعض صور الممثلات أو المغنيات في توقيعهم أو في صورهم الرمزيه وهذا الشيء يعتبر فتنه وحرام وأسأل الله لهم الهداية

أخ خ خ خ خ خ بس

اللهم يامقلب القلوب ثبت قلبي وقلوب جميع المسلمين على دينك وعلى طاعتك واتباع سنة نبيك
وأبعد عني وعن جميع عبادك المؤمنين المعاصي والفتن مثل ما باعدت بين المشرق والمغرب

إنك سميع مجيب الدعاء

هذا والسلام عليكم ورحمة الله وبركاته

محبكم في الله وسائق الليموزين / عبرود[/align]