منتديات الرائدية - اخصائيه نطق لذوي الاحتياجات الخاصه

مستشفى مطلق التخصصي بشارع البلديه وفر اخصائيه ذوي الاحتياجات الخاصه ..

طبعا مع انخراط اطفال التعليم الخاص وهم فئه الاطفال بصعوبات التعلم مايطلق عليهم (( الفكريه )) بالمدارس العامه وطبعا كلنا نعرف هالفئه احباب الله مع انخراطهم بالمجتمع من خلال وجودهم بالمدارس مع اطفال التعليم العام هالشي سهل كثير على الاطفال وعلى اهاليهم موضوع تعليمهم والحكومه ماقصرت حطت مدرسه واللي هي الابتدائيه الرابعه للبنات بالشماليه يقدرون يلتحقون فيها لتحصيل العلم بقدر ماتستوعب مستوياتهم الفكريه لكن كانت تواجه الاهل مشكله وهي عدم وجود متخصصه بالنطق خصوصا وانو الخفجي مافيها معهد لتبني مثل هالحالات مثل باقي مناطق المملكه وكل مره تتواجد معلمه متخصصه بالمدرسه تكون جايه من القطيف بعقد وينتهي وتروح وتترك الطالبات في منتصف الطريق وتكون تخصص تعليم خاص تعلمهم القراءه والكتابه فقط وممكن السلوك لكن ماهم متخصصين بمشكله النطق بالذات مع العلم انو هذه اهم نقطه لانو من خلال النطق الطفل بيعبر عن ذاته وعن احتياجاته وهذا اللي نبيه !! وحاليا كثير مايخلون معلمات التعليم العام جزاهم الله خير يقومون بتعليم هذه الفئه لكن كلنا عارفين انو مو اي احد يقدر يتعامل معاهم ولازمهم متخصصين عشان يقدرون يرفعون من مستوا وعيهم وتفكيرهم واخيرا احد فكر بهالفئه الملائكيه من سكان الخفجي الصغار ووفر متخصصه تساعد الاهل على تمرين هالاطفال وتعليمهم اساليب النطق وتحديد مستوا الذكاء وتعليم الاهل الطرق السليمه للتعامل مع اطفالهم من هالفئه وكيف يقدرون يعلمونهم وينمون المواهب الموجوده عندهم وتعلم الطفل ايضا كيف يعبر عن نفسه وعن مشاعره.. بالعموم الاخصائيه بالمرا شاطره وماشالله عليها طولت بال وذمه وضمير اسمها نورا والله ينور طريقها بصراحه اهالي الخفجي المحتاجين لها واللي كانو بانتظارها على احر من الجمر جتهم وكانها نزلت عليهم من السما انا كنت اعرف ناس يطقون مشاوير للدمام وللكويت بالاسبوع مرتين وثلاث عشان يحضرون كلاسات مع اطفالهم ..

الحلو بالموضوع انو الفئه المستفيده مش بس الاحتياجات الخاصه ولكن ايضا صعوبات التعلم والتعثر بالنطق واللي عنده حرف طاير مايقدر ينطقه ممكن هي تساعده انه يرجع ينطق الحرف وتعطيه تمارين لغايه مايتعود ينطق بشكل طبيعي مثل اللي ماينطقون الراء يصيرون يعرفون ينطقونها بالتمرين ..

والمواعيد مش غاليه خصوصا مع النتيجه المكتسبه وانك تصير تعرف طفلك لما يقعد يحاول يعبرلك عن الحاجه اللي يبغاها وانت منت عارف تتفاهم معاه وتصير بكل سهوله تفهم عليه ياربي لك الحمد .. بصراحه جزاهم الله الف خير على هالخطوه اللي كنا بحاجه فعليه لها بالخفجي وياريت يجيبون اكثر من وحده ويفتحون اكثر من عياده لانو الدكتوره نورا بالمرا مضغوطه وعلى فكره تراها من اكثر من ثلاث شهور موجوده بس انا توني ادري :d ويمكن الخبر يكون قديم بس انا اتكلم من واقع تجربه لاننا جربناها وبصراحه حيل استفدنا .. انا قلت اكتب هنا عشان ممكن يكون فيه ناس بمثل الوضع اللي كنا فيه لما كنا نبحث عن اخصائيه ويكون هالموضوع هو الدليل اللي يساعدهم ..