منتديات الرائدية - بالدين والكاش ........

[align=center]لا واهني ؛ طيورها..في ؛ عْشَشْهـا
ما حاشت الأرزاق..بالدَّين ؛ والكاش

تتبع ؛ مشاهيها على كل مَشْهَـا
ما يومْ ؛ من بعضْ التفاكير ؛ تِِنْـداش

تطير ؛ ما تْدَاريْ.. خواطرْ دبَشْهـا
ما تشوفْ ؛ ما تَكْرَهْ وتِغْضِي بالأرماش

ما أحدٍ ؛ يِعِزْ النَّفسْ حَزَّة ْ؛ عَطََشها
لو عُمْرهـا ؛ في عِزِّةْ النفْس ؛ تِِعْتـاش

روحْ الظمأ ؛ تلهث لفارغْ ؛ غْرَشْها
وتْمُصْ ؛ من ناعمْ..ثَرى القاعْ وجْرَاش

تِخْفِي بِمَكنون..الضماير ؛ غَشَشْها
وتِِِنْفَش ؛ لو في بعضْ الأيام ؛ تِِِِهْتَـاش

نصيحتي : من زَرعْ..قلبي حَشَشْها
للي بصدرِه ؛ من هموم الدَّهر ؛ حـاش

النَفْسْ ؛ لا من نابْ هَمِّك نَهَشْها
لا ناشْهَا ؛ من جَايرْ الوقتْ ؛ نَهَّـاش

ضمه بصدرك..لَوْ ضلوعِك ؛ عَرَشها
لا تِشْكي أوجاعْ الضماير؛ على اللاش

صَبرِك على نفْسِك يْداوي غَشَشْها
والْهَـمْ ؛ ما يجلاهْ.. بالْهَرج هَـللاش

ما لِك ؛ بخلان الدُوَشْ ؛ في دوَشْها
سوالفٍ ..ما بين ناجِِِشْ ونَجَّاش؟

بالسوء ؛ تدبي.. مثل دابي ؛حنشها
عسى ؛ لها من ضاري الناب ؛ نتَّاش

الشَّر : له ناسٍ تْمَشِّـط شْوَشْهـا
ويْلَوْلْشُون ؛ بطاريْ الشَّـر ؛ لُوْلاش

ناسٍ ؛ تِصَنَِّتْ حَولْ خارب حْوَشْها
طوْل الليالي ؛ عند..سِيْسَانْ الأحْواش

تْحَارِشْ ولو ما أحدٍٍ بِشَرِّه حَرَشها
مثل الكلاب إلى سْمَعَتْ حِِسْ خُرْفاش

وكم طيِّبٍٍ؟ للناسْ كبدِِه ؛ فَرَشْها
ما منه ؛ يأتي غير ما يبْهَـج الـجاش

ما يقْرب البَلْشَات..واللي ؛ بَلَشْها
ما هوبْ ؛ رَفَّـاشٍٍ ..ولا هوبْ دفََّاش

له وحْشةٍٍ ؛ لا غاب ؛ ما أحدٍ وحَشْها
ما بيننا ؛ ما كن ..لو لحظةٍٍ ؛ عـاش

يا عيالْ: يذْكر واحدٍٍ من حَبَشْهـا
زمانْ ؛ ماضي يوم هجرات ؛ الأحْبَاش

واللي حكى لي كان هو ما هَلَشْها
يقول : قاله بـأول الوقت ؛ عكَّـاش

والعالم الله ؛ كان هو ؛ ما عَكَشْها؟!
يقول: بِهْ واحدْ..للأقدارْ ؛ فَـتَّـاش!

في خطْ واضحْ ..لو طلبته رِقَشْهـا
اللي بقى من أقدارْ..عُمْرِك على شاش

وإلى إنتَهيتْ من القرايةْ ؛ مَحَشْهـا
ما كِنِّه ؛ ألا يعْمِِي..العين ؛ بِِفْـلاش

العِلمْ : عند اللي بلوحِه نقَشْهــا
الواحد اللي كوَّن الكون مـا نـاش

لو واحدٍ ؛ صَفْحةْ حَياتِِهْ ؛ فتَشْهـا
وشاف ؛ المنية عُقب يومين ؛ وإنْحاش

رزقِهْ قضَى ما غير خُبزهْ ؛ خَمَشْهـا
وعَضْمينْ ؛ بيضٍ..ما بهن مُخ وعْرَاش

مع بيضْةٍ من روعْ قلبه فِقَشْهــا
محرومْ ؛ من مالِه.. عَقَـارِه ولأدْباش

ينساق ؛ بِدْروبْ السَّهلْ عن عَفَشْها
ويْروْغْ ؛ عن كل النشايب والأبْلاش

يِنْلاعْ ؛ لو صِبْعهْ..عْوِيدٍ خَدَشْهـا
خوفْ ؛ الْمِنـيَّةْ ..فيه بالحيل رَفَّاش

كنِّه ؛ يْشوفْ بِكِلْ صوبٍ نعشهـا
وخوفْ المنيَّةْ : صار للروح نَخَّـاش

جَتْ له ؛ على دَرْبه بِزَاهي رْشَشْها
بأجْمل ؛ جَمالٍ يجْذب النفس وفْرَاش

من باهي ؛ أشكالَهْ وظاهر بِشَشْها
وريح العطور اللي على اللبس رَطَّاش

غَريْمَهَا ؛ من حين..شافَهْ هَتَشْهـا
وهي كلها شَرٍّ لِمِنْ جـاه طَـرَّاش

شَدَّت على حَلْقِهْ سَلاسل بِِيَشْهـا
وُهُوْ ؛ مطيعٍ ما تَنَخْوى ولا هـاش

أقدارْ :تِخْفي.. شَرَّها في خْيَشْهـا
في خَبْط ؛ عَشْواها الأملْ ما لِه إنْعاش

أـامْ :توفي دَيْنهـا ؛ في ريَشْهـا
تَمْضي ؛ وحِنَّا..بين نافخْ وفَشَّـاش

ناسٍٍ على ناسٍٍ .. تنافخ خْشَشْهـا
ونشوف شيبانٍ ..تزاعَـلْ على ماش

دنْيَـا دِنِيَّـهْ :لو زَهَتْ لك بْقَشَهْا
جودِك وما جودِك بلا جُوْدها مـاش

إن عَجِّعجَتْ قشَّت علينا قِشَشْهـا
وإِنْ أمْطَرَتَ لقشاشها السيل قَشَّـاش

لا يخدعك به رَشْ باردْ طْشَشْهـا
إحْذر غّرَقها كان ميزانـها طـاش

للشاعر :شايم لافي الهمزاني

تحياتي للجميع[/align]