منتديات الرائدية - ليتك قبل لا نتفارق / طحت من عيني

ليتك قبل لا نتفارق / طحت من عيني
عشان لامن نسيت .. انساك بالمـرّه

لكنك اقرب لـ( دمي ) من شرايينـي
وغلاك له في ضلوعي كـرّه وفـرّه

اصارحـك .. لان مايعنيـك يعنينـي
واعاتبك .. وانت لعيون الغـلا قـرّه

خابرك مهما افترقنا ما انت ناسينـي
وانا اتذكـرك فاللحظـه 100 مـرّه

اسمك لحاله عن اللي جاي مغنينـي
منقوش فالقلب نقش ٍ في صفا الحرّه

الله يسامـح خطـاك ولايخليـنـي
ان كان الاحساس ماعندك منه ذرّه !

وشلون ياللي مصافينـي / تجافينـي
عـزالله ان الليـال السـود مفتـرّه

لكن وش اقول والا ويش في يدينـي
مدام عهد المواليف انكشـف سـرّه

من ضيقة الصدر فيني مـا يكفينـي
تعـيّـن ! زرار ثـوبـي يالله ازرّه

ان كان ماجيتنـي يابهجـة سنينـي
غديت مثل الشهيـد محمـد الـدرّه

ما أظن تبقـى عناوينـي عناوينـي
يموت فيّ الغرام بـ ( خيره وشرّه )

مجبور في واقع ٍ ماهوب مرضينـي
هذا مصير ٍ عليه النفـس مضطـرّه

خذ همي وشوقي وجرحي وسكينـي
لـ( عالم ٍ ) ينتظرك .. ودربك يمرّه

شف عاد قلب ٍ قسمته بينك وبينـي
عانه تقفّاك .. واقتصّك على الجـرّه

الله يوفـقـك .. والله لايعنـيّـنـي
الحب .. ماعاد ابي بحـره ولا بـرّه