|
مجلس ابوسلطان
اررررررررررررحبوا
يالله حيهم مرحبا هيل عد السيل حياكم الله البيت بيتكم والمجلس مجلسكم الشبه والعه والدلال والمه والسمن العرابي علي الحلوةوالخلاص زاهبه |
السلام عليكم ورحمة الله وبركاته
ياشباب انا باقي علي التقاعد حقي من العمل 8 سنوات ولاعاد فيني شده مطارد بين الاقسام قلت ابرتاح في هالمجلس واستقبل الضيوف وحي الله الجميع |
هاك السنه يوم جاني فواز العنزي وكنا جالسين في مكتب مؤقت يعني كنا في برتبل متنقل
قال ترى خوينا غانم سوي له منتدي خاص يهتم بالخفجي قلت علي طول سجلني يابو مزعل ودخلنا علي الرابط قلف سيرفر وسجلنا بالرائديه ومن ذيك السنه وانا بالرائديه |
كان خالي رحمه الله ساكن في عشيرق بل من مؤسسي عشيرق بالخفجي
وكنت اجلس عنده بالايام والشهور حيانا كان مجتمع عشيرق صغير والناس اول علي قلوبهم والحياه صعبه شوي خصوصا السفر كان هذا حتي سنة الطفره اللي قلبت الناس فوق تحت وانشغل الناس وكل واحد انشغل بحياته وطلب رزقه وكثرة الناس بالخفجي وبنوا احياء جديده وتباعد اهل عشيرق خصوصا الجيل اللي بعد الطفره لكن الشيبان بقوا علي التواصل كانوا الناس في عشيرق علي قلب واحد في احزانهم وافراحهم اللي مريض يعاودونه والي مات له قريب الجميع يعزونه واذا صار حفل زواج جميع اهل عشيرق متواجدون هذههي الحياة في عشيرق ومينا سعود والوفره حياة قاسيه وصعبه ولكن التكاتف بين الناس قوي جدا الله يعيدها يازين بيوت الشينكو القديمه ويازين ماء الزير البارد |
السلام عليكم ورحمة الله وبركاته
كنا نسافر من الوفره الي الديره ونقعد اربع ايام من الخفجي الي الرياض نصف يوم ومن الرياض الي الطائف حوالي يوم كامل ومن الطائف ننزل علي مكه المكرمه نعتمر ونواصل السير الي قلوه وهذا ناخذ فيه يوم وحنا راكبين بسكس قينان اذا وصلنا الي قلوه حملنا اغراضنا وزهابنا فوق الجمال وصعدنا قمة جبل شدا الاعلي يعني نمشي في الضحي من قلوه ونصلي المغرب وحنا بالديره والعوده نفس الحكايه كان مع الوالد رحمه الله وخالي بيجو بوكس موديل 68 او 69 واحترق علينا وحنا علي الخط وتركنا السياره واخذ الوالد تكسي عباره عن شفر طويل وتحاشرنا فيه ونزلنا من عقبةالهدا ووصلنا الكر كل هذا وانا جالس بوسط السياره ومحشور حتي اني اتخيل ان اكتوفي تلاصقت من كثر الزحمه كانت ايام حلوه |
السلام عليكم ورحمة الله وبركاته
اتذكر اول مرض جاني كنت اكح كحه يسمعونها الجيران كان لها صوت قوي كان عندنا في الحاره دواء كحه واحد فقط يدور حول الجيران اتذكر ولد جارنا واسمه صالح كان عنده كحه زيي كنت اشرب من فم الغرشه وهو يشرب بعدي وكنت امشي حافي ولا اخبر اني لبست نعال واذا انجرحت رجلي وطلع الدم كنت احط عليها طين او قهوه واذا كنت مستعجل حط عليها رماد دخان واما اذا كان الجرح كبير ويحتاج خياطه فلابد من الذهاب الي مستوصف الشركه والي الدكتور منصور رحمه الله سقي هيك السنه |
يازين هالمجلس
والله من طيب معآزيبه رآح نحل ضيوف ومعازيب كلما استجدت مذكراتك لكن القهوه يالطيب ربي يسعدك بطاعته ويمد عمرك فيها |
يازين هالمجلس
وياطيب سوالفك :) إسلم يا أبو سلطان مستمعين بإستمتاع :101: |
حسيت إن جدي قاعد يسولف :eek: :biggrin:
أحب السوالف القديمه خير وبركه أيام قبل ,, مستمتعين بسوالفك ..:rolleyes: |
اقتباس:
حياك الله في مجلس ابوسلطان |
| الساعة الآن 11:28 AM. |
Powered by vBulletin® Version 3.8.7
Copyright ©2000 - 2024, Jelsoft Enterprises Ltd.