الخوة اللي تختلف مابين ليل وبين يوم
الله يبعدهاويبعد ليلها مع يومها
لاصار ماتبني على زين العوايد والسلوم
يغنيك ربي عن عوايدها وشين سلومها
خوة طليقين اليماني والرياجيل القروم
تشفيك لا من الليالي ح ضرت بهمومها
اللي ليا منه بدالك يالسنافي من الزوم
تفزع معك فزعة رجالن ماتموت عزومها
لاضاقت الدنيا عليك وبان للضيقة رسوم
من ضيقتك ضاقت عليهم يالشجيع هدومها
وان كان عينك من غثا الدنيا تملل ماتنوم
عندي ضمان عيونهم ماتهتني في نومها
كذا يبينون الرجال الصادقين من الرخوم
وكذا نعرف صقورها ياصاحبي من بومها
حنا بلشنا في مهايط بعض بيضان الهدوم
اللي ييحطون السما في راحتك ونجومها
علومهم وقت الرخا ياحي هاذيك العلوم
تقول ذولا من شياطين العرب وقرومها
وان لفت الدنيا وحضر وقت تشمير الكموم
في ذمتي ذمه تضيع افعالها وعلومها
المرجله في كوم وافعال الخبل في وسط كوم
ما تجتمع واللي رفع سقف السما وغيومها
عشنا على الدنيا ولاعاشو ردين العزوم
اقولها والناس تفهمها حسب مفهومها