أول شي.. أحب أوضح أنو الإقتباس مو راكب على الرد أخ سامي..
( هذا للتوضيح بس )..وأعتقد انو كلامي عن المخالفات منطقي جدا..وأنا مع احترامي لكل اللي يكتبون في المنتدى كان ردي كافي وشافي وواضح وبدون لف ولا دوران.. وبالعكس أتمنى أنو أي شخص قرأ هذا الموضوع واستوعب الرد عليه يبدأ في توعية اللي حواليه...ليش؟؟ لأن معرفة الخطأ هي بداية للتصحيح بإذن الله..
ثانيا.. أعرف ياعزيزي انو الكلام هذا ما جبته من راسك.. واعرف انو هذا هو الكلام الدارج.. بس مايعني انو هذا الكلام الصحيح...
ليش؟؟ مشكلة البنات عندنا في الكلية انهم يختلقون الأشياء وينشرونها بشكل فضيع حتى بدون مايكون لها اساس من الصحة في بعض الأحيان أو بمعنى آخر مايحاولون يتعبون أنفسهم في حبك الكذبة هذي وعشان أأكد لك انها من اختراع البنات بذكرلك التوضيح وفقا لتسلسل كلامك.. ونبدأ ب...
ـــ الكلام هذا يتراوح على ألســنة طالبات الأنجليزي .
أعتقد ان حضرتك تتكلم عن مشكلة قسم االغة الإنجليزية.. صح؟؟ وطبيعي انو الكلام والإشاعات تطلع منهم لأنهم أصحاب المشكلة.. هم معذورين في قلقهم حيال مستقبلهم .. ومحد يلومهم.. لكن تدخلهم الأكثر من اللازم في شغل الإدارة محد يعذرهم عليه.. لأنهم كثروا من الهرج والمرج وسببوا ربكة في الكلية والنتيجة معروفة سلفا ألا وهو إن توفير أعضاء هيئة التدريس من اختصاص وكالة الكليات بالرياض..وواجب الإدارة فقط هو تطبيق مايرد إليها من جهات عليا فقط... وبالرغم من كذا فالإدارة جعلت من هذه المشكلة همها الأول...والعميدة والحق يقال... وأتمنى إن ربي يجعل هذي الشهادة في ميزان حسناتي .. ماوقفت مكتوفة الأيدي ..كانت تبحث بدورها عن أستاذات وترفع أوراقهم لإدارة الكليات مع انو هذا مو شغلها... مو بس كانت ترفع .. لأ كانت تتابع وبشكل مكثف... وتحاول أن توجد الحلول وهي غير مسؤولة عن هذي المشكلة..
ــ و لكن العميـدة قالت لهن بالحرف الواحد ( أنا أرسلت لعميد القبول الدكتور : عبدالعزيز الرشودي : و لكنه قال . أنه لا يوجدفي الوقت الحالــي استاذ ولا استاذه متقدم لمادة الإنجليزي . ) ...هذا هو رد العميـدة على الطالبـات .
أقسم بالله العلي العظيم أن هذا الكلام ما حصل وأن هذا من عقل البنات لسببين:
1-أن الدكتور : عبد العزيز الرشودي هو عميد القبول والتسجيل .. والكل يعرف هالكلام لكن البنات مو عارفين وش معناته .. متوقعين ان مافي الوكالة غيره يعني؟؟ هو عميد القبول والتسجيل بالنسبة للطالبات ...وموافقته واعتمادها تسري على قبول الطالبات في الكلية فقط.. لكن هناك مسؤوليات ومهام محدده لكل فرد في الوكالة... لكن الدكتور عبد العزيز لا يختص بشؤون الموظفات... ولأن البنات يجهلون هذي النقطة فهم يألفون كلام .. العميدة قالت ما جا رد من الوكالة.. وأخواتنا في الله مايعرفون غير الرشودي ..فيوم ألفوا كلام نسبوه عشان يضبط.. ولا تقوول بأني اضخم الأمور لأني في جو الكلية وأعرف وأشوف وأسمع من الطالبات أنفسهم...
2--كون ان العميدة كانت تسعى لإيجاد الحلول رحمة بالطالبات .. هذا ما يعني انها هي المسؤولة عن المشكلة أو انو مطلوب منها تحلها... لكن العميدة فعلا رفعت أوراق كذا وحدة كمحاولة فقط لحل هذى الأزمة.. ومن هنا اختلقوا البنات سالفة انو مافي أحد متقدم للعمل..مع ان حتى رفع الأوراق لايعني ان العميدة تقدر تلزم الوكالة بالتعيين..
3- ان عملية التعيين ماتتم بهذي السهولة .. ولا بالطريقة اللي متخيلينها الخلق.. لأن التعيين يخضع لعدة ضوابط وشروط...لايعرفها الا أهل الإختصاص ..حتى موظفات الكلية مو الكل يعرفها ... طبعا أنا ماني مخولة بأني أرد على شئ مو من إختصاصي..مع معرفتي به.. هذا اللي يرد عليه الوكالة..
ــ و بالحرف الواحد قالت لهـن .. ( إذا تبون استاذة إنجليزي كل طالبة تدفع 100 ريال حتى يكتمل المبلغ 13 ألـف للإعلان في جريدة اليوم )
طيب وش رأيك بأني أتـحدى أي طالبة فيها ذرة من الشجاعة تجي وتقول أن العميدة أو أحد الإداريات قالو هالكلام...
تدري ليش؟؟ برضو لعدة أسباب...
1- البنات احنا أعطيناهم وجه أكثر من اللازم مراعاة لمشاعرهم... حتى انهم كانو يتجمهرون قدام مكتب العميدة.. وبشكل في غاية ...والمبرر هو أنو في الدول المتقدمة يسوون مظاهرات عشان يحصلون على مطالبهم (شوفوا بس التفكير) !!
المهم ان العميدة كانت تدخلهم وتوضحلهم الأمور( مو خوفا منهم أو من شكاوي أهاليهم..لأ طبعا رحمة فيهم..) مع اني أقدر أحلف بأن مافي عميدة فاتحة بابها للطالبات قد الدكتورة كوثر...
مو بس عميدات أقدر أحلف على مديرات المدارس بعد...
غير رئيسة القسم اللي كانت تحاول تمتص غضبهم...
وإن جيت للحق المفروض انو نرمي الخبر للبنات كأمر مفروغ منه.. لأن إذا الوكالة قالت جمدوا القسم.. احنا كموظفات وش دخلنا؟؟ لكنا تعاملنا معهم بمنظور انساني بحت بناء على طلب عميدتنا.. وهذا الشي خلى البنات يحسون انو الإدارة مقصرة والخطأ منها .. والا ماكان عاملناهم بهالطريقة..
ولما أصدرت العميدة قرار بجعل التدريب متصل بالإتفاق مع رئيسة القسم وبموافقة عليا.. وهو كحل يعتبر جدا منطقي وأكثر من رائع ويشكرون عليه.. بدأ التذمر من الطالبات.. مع العلم ان مشكلة مثل هذي تحصل حتى في الجامعات.. واللي دارسين وفاهمين عارفين هالشي..
لكن أن يعوم أولياء الأمور على عوم طالبات حتى نظام الدراسة التكميلي والمحمول مايعرفونه وهو من شؤونهم ... ويجون يحاسبون الإدارة بالرغم من عدم صلاحيتهم لهذي المحاسبة فهذا شي غريب جدا..
2- الإدارة تمنع أي عملية جمع أموال بدون علم الكلية وهذا نظام واضح وصريح ومتفق عليه..
وانا كموظفه سمعت من بعض الطالبات بأنهم يجمعون فلوس.. قال ايش؟؟ احنا شكلنا مانبلغ الوكالة؟؟ ولما نشروا الخبر في الجريدة أكثر من مررة وبأكثر من طريقة وما صار شي.. قالو وبإجتهاد طفولي انو مافي غير انهم يجمعون فلوس ويحطون إعلان كبير للملك..عشان يحل مشكلتهم...
وأنا هنا أقول طفولي لأن فيه إظاعة للمال بدون فايدة.. إحنا كإدارة مابيننا وبين البنات شي عشان ما نرفع للوكالة هذا أولا..
ثم إن الوكالة عارفة عن المشكلة هذي من الصيف... فإذن هم يدفعون فلوس عشان يوصلون معلومة معروفة مسبقا .. وبشكل رسمي..
وأحب أوضحلك بأن البنات قالو إن الإعلان بيكون في جريدة الوطن... وما منعناهم عشان مايحسون انو احنا مستقصدينهم أو انو إحنا خايفين !!! هم أحرار بتصرفهم ..لكن ينسبون أفكارهم الطفولية للإدارة هذا شي مرفوض تماما..
ولأن البنات عارفين في قرارة أنفسهم ان حلهم غير منطقي راحوا قالو لأهاليهم انو العميدة قالت جمعوا فلوس...وطبعا يقاس عليها اي تجميع فلوس في هالكلية المسكينة..أما عميدتنا فأنا ما أقول إلا انشاءالله يكتب لها الأجر في هذي الإفتراءات المزعومة..
يعني على الأقل الواحد يتقي الله في هذي العميدة.. قسما بالله ماقد شفت أحد يحن على الطالبات ولا يخاف عليهم قدها... لكن ماراح يعرفون البنات وأهالي الخفجي قدرها إلا لمن يجربون غيرها.. وراح أذكركم بإذن الله...
وإذا تبغون الجد فهي خسارة في أهل الخفجي .. لأنها مو دكتورة لا..هي ( أ.د) يعني بروفسورة... فطبيعي انو مافي توافق فكري..أحد غيرها كان مايعبر أحد لكن وش نقوول؟؟؟ الدنيا حظوظ.. واللي يضيع في الدنيا مايضيع في الآخرة..
ــثانيـا ً أنتي تعلمين أن بعض الاستاذات في كلية التربية في الخفجي يحملن شهادة الباكالوريس !!! يعني معيدات في الكليـة .!! هل إدارة الكلية تكلمت من خلال هذه النقطـه ؟ و المعروف أن في جميع كليات و جامعات المملكة أن أقل استاذة تحمل شهادة الماجستيـر . أو الدكتوراة !!
ياعزيزي أتمنى أعرف المصادر اللي تتكلمون عنها بالنسبة للأنظمة..ومين يقوول بأن أقل أستاذة تحمل شهادة الماجستير أو الدكتوراة؟؟ إذا كان هذي الأقل فوشو الأعلى؟؟
أحب أطمنك بأن التوظيف على رتبة معيدة مهي حاصلة في الخفجي بس .. لا.. هو نظام معروف في جميع الجامعات والمعاهد والكليات بأن أقل أستاذه هي برتبة المعيدة.. وللمعلومية المعيدات هذولا كلهم أمتياز مع مرتبة الشرف .. وماخذينها من كليات أو جامعات صعبة الأنظمة فيها ..بالإظافة لأنهم أخذوها وهم متغربات عن أهاليهم لأن أغلبهم من سكان الخفجي.. فحققوا معادلة النجاج الصعبة.. بالإظافة للغربة.. مو بنات الخفجي اللي حتى ورقة التعريف يجي أبوها أو أمها ياخذونها لهم.. بالإظافة إلى حسن تعامل الأستاذات وتساهلهم مع الطالبات لأبعد الحدود..
وهذولا الأستاذات يدرسون بناتكم وأغلبهم مقبولين لتحضير الماجستير... واللي مأخر بدء دراستهم هو حرصهم على عدم إحداث ربكة في الكلية مثل ما حدث لقسم اللغة الإنجليزية..ثم ان في دكتورات وبروفسورات في الكلية.. فأتمنى منك ياعزيزي عدم التقليل من شأن الموظفات في الكلية؟؟
ــ لنقول . أن 90% من طالبات الكلية متخلفات و مستهترات و لم يأتن إلى " للكشخـه "
و لكن . هنــاك 10 % من طالبات الكلية أمامهم مستقبـل .!!أمامهم حلـم .. ولكنه تحطم بسبب نقص الاستاذات . !!!
أتمنى من إدارة الكلية الإسـراع في معالجة االنقــص .
ال90% راح يصيرون عدد لا يذكر في الكلية بإذن الله في ظل التكاتف الملحوط بين المندوبية وبين ادارة الكلية ووكالة الكليات.. اذا ساعدونا الأهالي بتوعية بناتهم وحثهم على احترام القوانين والأنظمة..خير وبركة .. واذا أخذتهم العزة باإثم فأنا أحب أطمنكم بأن النظام ماشي ماشي ..
أما بالنسبة لل 10% فالسنة لسى ما انتهت وهذي الزوبعة راح تكون في خبر كان لأن البنات عارفين ان الوكالة تعاقدت مع إحدى الأستاذات وراح تباشر بعد العيد بفترة لذلك حاولت الإدارة جعل التدريب متصل ... لكن الظاهر انو البنات والاهالي .......
أما بالنسبة لأن الإدارة تسرع في حل هذا الموضوع.. فأعتقد إني كفيت ووفيت في الشرح والتفصيل للأحداث ... وللمررة الأخيرة هذا مو شغل الإدارة هذا شغل الوكالة..
ـــ إذا كنتي من إدارة الكليـة ..
أتمنى عدم أخذ الرد السلبي من الأخ عربيـد و التوجه إلى الرد الإجابي
و الإجابة على هذه النقطـه .
المصيبه الكبرى الكليه لايوجد بها ماء بتاتا منذ تأسيسها
اكرمكم الله دورات مياه بدون ماء ما الفائده ؟
نعم انا من إدارة الكلية..
أنا ما أخذت الرد السلبي لكن أنا فعلا لي تعليق على كلامه الأكثر من الرائع... أنا كل اللي أطلبة بأن الواحد يفكر انو محاسب على الكلام اللي يكتبه..فإذا مو متحقق منه لا يقوله .. مو عاد ...... ( أتوقع واضح اللي بقوله )
ومعروف.. " كفى بالمرء كذبا أن يحدث بكل ما سمع "..
حديث صحيح رواه مسلم.
أما بالنسبة لدورات المياه ... فأنا ماطنشت هذي النقطة لأ والله كان على أساس إني أعلق بشكل سريع عليها ونسيت.... الحقيقة اني ماعندي فكرة عنها...