[دانة الكون]

الجزء الرابع عشر....


كان طالع وشافهها وهي طالعه تمني يجرها من شعرها ويدخلها داخل بس كان متأكد انه رح يعقد المسأله اكثر...لانه جرب كم مره معها هالاسلوب مانفع لان امه وابوه معها ومستحيل يرضون انه يمد يده... كان لازم يتحكم في اعصابه ويحاول يتكلم مع اهله بهدوء حتى يقدر يأثر عليهم....
اول مادخل بيت اهله واللي كان ملاصق لبيته كان امه وابوه قاعدين يسولفون ابتسموا اول ماشافوه....
محمد:"السلام عليكم..."
ابو محمد:"وعليكم السلام ...هلا بولدي"
ام محمد:"هلا بمحمد اشلونك ياولدي..مااشوف نايف ونواف مروا علينا اليوم"
محمد:". العيال تعرفين اجازه وتوهم صاحين قبل شوي..."
ام محمد:"اخاف بس العنود ماتخليهم يجون"
تنهد محمد في خاطره اللحين امي بتقلب السالفه عن العنود وممكن تعصب...وانا ابي اكلمهم في عبير اللي لازم يكونون هادين حتى يتقبلون مني...
محمد:"اشلون تمنعهم من اهلهم الله يهديك...واللي يسمعك مايقول انهم كل اشوي ناطين لك في البيت..."
ابو محمد:"ماعلينا احنا بنسافر خلال هاليومين اذا تبي تخاوينا...."
محمد:"لا مااقدر...تدري العنود حامل وصعب عليها السفر..."
ام محمد:"ايه ماعليه حطها عند اهلها وسافر انت والعيال معنا..."
محمد:"صعبه يمه اسافر...وبعدين خيرها بغيرها...على وين ان شاء الله بتسافرون"
ابو محمد:"كالعاده على لندن..."
محمد:"ماادري ليش تحبون لندن.."
ابو محمد:"والله مااحبها بس عبير ماتنبسط الافيها..."
محمد وانا ماقهرني الا عبير ورغباتها اللي عندكم تصيراوامر...
محمد:"على طاري عبير ...مااشوفها"
ابو محمد:"طلعت السوق قبل شوي..."
محمد:"ماكنها زايده طلعاتها..."
ام محمد:"راحت تشتري شوية اغراض لسفر وبعدين من الملل تطلع وتوسع صدرها"
محمد وهو يحاول يتكلم بهدوء:"وفي السوق توسع صدرها؟؟؟"
ابو محمد:"ايه عبير لما تشتري اللي خاطرها فيه تنبسط ...وهذا اللي ابيه"
محمد:"طيب ماتشوفون هيئتها لماتطلع.."
ابو محمد:"عااااادي كل البنات كذا"
محمد:"لا يبه مو كل البنات كذا..."
ام محمد:"لا تظن الحريم مثل مرتك...مرتك بالنسبه لعبير عجوز..."
محمد:"طيب ما تشوفين ريم بنت خالتي..."
ام محمد:"حتى ريم لو مو اهلها متشددين شوي تلبس مثل عبير"
محمد:"مهو تشدد يمه ان البنت تطلع متستره في عباتها...للاسف عبير واللي مثلها صارت العبايه لزينه اكثر منها لستر تظهر العبايه اكثر مماتخفي...انتو ماتخافون عليها وهي طالعه كل شوي في كامل زينتها"
ابو محمد:"لا مااخاف عليها لان بنتي مربيه زين"
محمد:"ما ضيع بناتنا الا انا نخليهم على كيفهم ونقول احنا واثقين في بناتنا"
ام محمد:"اشفيك جاي وانت حاقد على اختك..."
محمد:"ايه حاقد عليها لما اشوفها..."
ام محمد:"ايه اكيد العنود شاحنتك على اختك"
محمد:"العنود مالها دخل...وبعدين عبير اختي الوحيد وتهمني مصلحتها..."
ابو محمد وهو يقاطعه بعصبيه:"اذا تهمك مصلحتها لا تتدخل في حياتها طول ماانا حي..."
محمد:"يابوي عبير بنت ضعيفه وممكن تتأثر من الكلام الحلو اللي اكيد تسمعه لما تروح الاسواق لوحدها...انا مستعد اوديها وين مابغت بس تترك الروحه مع السواق على كيفها"
ابو محمد"محمد ماعليك من اختك..."
محمد وهو قايم بيطلع:"ترى ذنب عبير في رقبتكم لو ضاعت لانكم انتو اللي ضيعتوها بطاعتكم العمياء لها..."

^^^^^^^^^^

في غرفتها وهي سرحانه وتفكر صعب احساس البنت لما تنخطب وتفكر في حياتها مع اهلها وانها ممكن تترك كل شئ وتروح مع شخص غريب...وتصير لما تجي بيت اهلها كانها ضيفه....
"امل للحين مالبستي..."
انتبهت على امها اللي ماحست فيها لما دخلت...
امل:"ها...شوي واكون جاهزه..."
جلست بجنب بنتها اللي كان مبين عليها الشرود وكثر التفكير هاليومين...
بدريه:"امل....اذا ماتبغين ولد عمك تأكدي مااحد بيغصبك.."
امل:"ادري يمه بس احس صعب اني اترك بيتي واهلي"
ضمتها امها لصدرها بحنان كانت علاقتهم مو ام بنتها كان بينهم علاقه صداقه قويه..
بدريه:"مصير كل بنت....وبعدين حتى لو صار نصيب الزواج بعد سنتين يعني لا تشيلين هم الفراق من اللحين"
امل وهي تتنهد:"كل البنات يحسون باللي احسه اللحين"
بدريه:"كان سألتي بسمه..."
امل:"سألتها قالت انا اختلف عن البنات في كل شي..."
بدريه:"يمكن قصدها ان اهلها ما ينحزن عليهم.."
امل:"لا...تقول كل شي مختلف حتى اول ليله غير...سالتها اشلون غير ...قالت غير وبس..."
بدريه:"عاد انتي يالقفك يمكن تحرجينها لما تسألينها..."
امل:"لا ماحسيتها منحرجه قد ماهي حزينه..."
بدريه وهي قايمه بتطلع:"اقول قومي تجهزي اللحين بنروح لاهلي"
امل:"من اول احب اروح عندهم من بعد ماجات بسمه صرت انبسط اكثر..."

^^^^^^^^^^

كانت تتفرج على التلفزيون وهو يتصفح الجريده من ذيك الليله وهو مايكلمها ولا كانها موجوده...صحيح ارتاحت من استفزازه لها بس شعور مهو حلو تحس انك مهمل...
رن الجواله...
خالد:"هلا والله تركي..."
تركي:"اشلونك ياخوي.."
خالد:"بخير الله يسلمك...اخبارك واخبار الاهل"
تركي:"الحمد لله بخير...كيف العروس..."
خالد وهو يناظر بسمه:"ما عليها طيبه..."
تركي :"كلمتك حتى ااكد لك تجونا ان شاء الله هالاسبوع..."
خالد:"ايه امس دقيت عليك كان جولك مغلق ...بغيت اعتذر..."
تركي:"ليه والله ننتظركم..."
خالد:"يااخي فيه ضغط في الشغل هاليومين ومااقدر اتركه...لكن متى ما سمحت الظروف نجيكم حتى من دون تلفون..."
تركي:"على راحتك...بس ماادري بسمه قريبه منك..."
خالد:"بسمه (ناظر بسمه واللي هزت راسها ومبين عليها لو تكلمه بتصيح) اللحين تحت بس اذا جات خليتها تكلم..."
تركي :"سلم عليها..."
خالد:"الله يسلمك..."
بعد ماسكر رفع جريدته يكمل قرايتها وهو حاس انها من القهر ودها تنفجر في وجهه في خاطره احسن خلها تتأدب..كان منقهر منها يوم استفزته وقالت انها تتسلى في رسايله اللي كان هو جاد فيها...
ماقدرت تسكت وهي تشوفه يرفض زيارة خالتها واللي انحرمت منها من زمان....
بسمه:"ليه اعتذرت منه..."
ناظرها خالد ببرود قهرها ورفع الجريده من غير مايرد عليه...
بسمه وهي تحاول تتحكم في اعصابها:"طيب تركي بيجي الرياض هالاسبوع عادي اروح معه..."
نزل الجريده وناظرها:"لا..."
بسمه:"طيب ليه..."
خالد:"كيفي.."
بسمه:"لا مو بكيفك تحرمني من خالتي"
خالد:"ما بحرمك منها بس منتي رايحه لها اللحين"
بسمه:"طيب خلني اروح مع تركي اذا ماتبغى تروح انت..."
خالد:"قلت لك لااااااااا"
بسمه:"اللحين انت ليش تعاملني كذا ..."
خالد:"ماتدرين ليش اعاملك كذا.."
بسمه:"وانت ماسألت نفسك اللي سويته تعتبره سهل..."
خالد وهو يرمي الجريده:"اش اللي سويته يابسمه .."
بسمه:"ابد سلامتك ...ماسويت شي..."
خالد:"هذا انتي انسانه غريبه....كل شي حسب مزاجها...بس ترى انا مااحب اكون على مزاج احد...خصوصا انتي يابسمه"
بسمه:"ومن انا في حياتك ياخالد ياحسره"
خالد ببرود:"قلت لك انتي ولا شي..."
انقهرت منه ومن ردوده وزعلت ودخلت الغرفه حتى مايشوف دموعها واللي نزلت غصب عنها...هو الغلطان ومع ذلك محملها مسؤلية كل اللي صار...
.
.
.
.
نزل خالد تحت عند اهله لما دخلت بسمه كان من الملل يبي يسولف مع احد لقى امه وابوه وريم قاعدين تحت...
ريم:"والله ملل كان خليتونا نسافر.."
ابو خالد:"ماسافر خالد وهو عريس حتى تسافرين انتي"
ريم:"خالد هو بكيفه مايبي يسافر لكن احنا متعودين كل سنه نسافر...ليش هالسنه حارمينا"
خالد:"حراااام ضعيفه ياريم اخاف تموتين لو ماسافرتي"
ريم:"السنه هذي من اولها نحس ماادري اش السبب"
ابو خالد:"استغفري ربك اش نحسه اللي تقولين عنه..."
ريم وهي تتنهد :"اخاف كلامي مايعجبكم...اسكت احسن.."
خالد:"احسن كلمه سمعتها منك اليوم...اسكتي.."
ريم:"ماني ساكته ياخالد....الظاهر من تزوجت وانت ما تحب تسمع الا صوت مرتك.."
خالد:"اللحين اش دخل بسمه في الموضوع"
ريم:"انت اصلا من تزوجت وانت متغير.."
خالد:"اناااا:"
ام خالد واللي ماصدقت:"ايه انت ياخالد....تغيرت علينا حتى ما تقعد معي مثل اول ولا تسأل عن حالي غيرتك هالبسمه"
ابو خالد:"ام خالد الله يهديك الظاهر ماصدقتي ريم فتحت الموضوع....خالد عمره ماقصر"
قام خالد عند امه وحبها على راسها:"تأكدي مافيه احد يقدر يغيرني على الغاليه "
ام خالد وهي تناظر ولدها بحنان:"اخاف ياولدي تغيرك مرتيك علي.."
خالد:"مستحيل يصير هالشي انا خالد يمه ولا يمكن انسى فضلك علي"
ام خالد:"الله لا يحرمني منك ياولدي"
خالد:"بس يمه حرااام تظلمين بسمه تراها طيبه واحس ان معاملتك انتي وريم معها جافه"
ريم:"ليه تخاف على شعورها"
خالد:"اكيد اخاف على شعورها نسيتي انها زوجتي..."
ريم:"مالت عليها من زوجه اصلا..."
ابو خالد يقاطعها بعصبيه:"ريم ما تحسين ان لسانك طويل..."
ريم:"يبه مهو بيدي ..مااحبها اكرهها..."
خالد:"مو لازم تحبينها ...كفايه انا احبها...بس حسني اخلاقك معها"
ريم:"اقل من شهر وحبيتها ونسيت كل اللي قبل...مااقول الا مااسرع ماتحبون ومااسرع ماتكرهون"
خالد:" ريم ترى عمري ماغلطت عليك بس الظاهر اذا استمريتي كذا مارح يصير خير"
كان التلفون يرن...
خالد:"الو"
سمع عبير الا هو اخر صوت يتمني يسمعه...
عبير:"مرحبا خالد..."
خالد حس انه ماله داعي يطول معها:"اهلين عبير...هذي ريم معك"
انقهرت عبير من حركته وخافت لا يكون اكتشف كل شي....
ريم:"عبير ابروح غرفتي واكلمك..."
سكرت التلفون وراحت غرفتها وكانت عارفه ان عبير بتسألها وهي مارح تقدر ترد قدام اهلها...اول ماوصلت اتصلت في عبير...
ريم:"الو"
عبير:"اشفيه خالد لايكون درى عن الموضوع"
ريم:"الناس يسلمون اول.."
عبير:"ريم..."
ريم:"ماادري عنهم بصراحه...لانهم مايبينون شي بس لاحظت من ذاك اليوم كلامهم مع بعض قليل جدا...وهي صايره تقلل قعدتها معنا..."
عبير:"اول ماكلمني خفت لايكون درى..."
ريم:"لو درى ما كان كلمك كذا..."
عبير:"طمنتيني اسافر يعني وانا مرتاحه ان الخطه ماشيه اوكيه"
ريم:"ماادري بس بصراااحه لاحظت انه يدافع عنها ولا يرضى احد يسبها حتى لو هالاحد هي امي"
عبير:"انتي مره تفرحيني ومره تخوفيني"
ريم:"انا بس انقل لك الواقع..."
عبير:"لا تضيقين صدري ...تدرين مسافره ومااحب اسمع الا الاخبار السعيده"
ريم:"لا تذكريني ضايق صدري انا مارح نسافر هالسنه"
عبير:"اقنعي ابوك وتعالي معنا"
ريم:"الظاهر انتي تكرهيني حتى تطلبين هالطلب"
عبير:"مافيها شي محمد مهو مسافر معنا وابوي حسبة ابوك"
ريم:"حتى ولو مستحيييييل يوافقون عشان كذا اسكت احسن من اطلب المستحيل"
عبير:"على راحتك...ياللا انا اللحين بسكر عنك تامرين شي"
ريم:"سلامتك سلمي على خالتي..."

بعد ماسكرت التلفون رمت نفسها على السرير اللي مهون عليها هالسنه انها لاقيه اللي يشغل وقتها...وليد رفعت التلفون بتكلمه بس هونت..... اليوم بتجي بدريه وساره ولازم تكون في استقبالهم...تنهدت وهي تسأل نفسها اش نهاية مكالماتها ...معقوله فيه زواج يتم بهالطريقه وان تم هل بينجح؟؟؟ دايم تحس بتأنيم الضمير وتقرر قطع علاقتها مع وليد بس تضعف في النهايه...

^^^^^^^^^^


لما درى ان بدريه وصلت طلع حتى قبل يسلم عليهم لانه عارف ان امل ورهف اكيد بيطلعون لبسمه واللي كانت زعلانه لما نزل من عندها حب ينبها انهم وصلوا...اول مادخل الصاله ماكانت موجوده عرف انها داخل...قعد وهو مستغرب من نفسه شعوره ناحية بسمه غريب ماكانت تعني له في حياته أي شي.... واللحين صار يفكر فيها اكثر بكثير مما يفكر في عبير.... صحيح انها غالبا تنرفزه وهو يرد لها الصاع صاعين بس مايمنع انه يحس ناحيتها احساس غريب كل ماله يكبر في داخله...
تسأل في نفسه ممكن يكون حب...طيب اللي كان ولازل يحسه ناحية عبير اش يسمى وهل ممكن الشخص يحب شخصين في وقت واحد...
-":ها...اكلمك يالحبيب"
خالد:"كيف دخلتي انتي ووجهك..."
امل:"دخلت عادي مثل ماالناس يدخلون ...طقيت الباب مااحد رد فتحته شفتك سرحان في عالم ثاني كلمتك مارديت...قلت ادخل اشوف لايكون جاك فقدان للذاكره"
خالد:"اولا مادام مااحد رد المفروض ما تدخلين..."
امل:"اقول وين حرمتك بدل هالمحاضره اللي مارح تنتهي قريب"
خالد:"لازم افهمك بكره بتتزوجين ولازم تعرفين الاصول"
امل وهي تصارخ:"بسمه تعالي انقذيني "
سمعت بسمه امل وضحكت في نفسها من طريقة كلامها وفتحت الباب...
امل اول ماشافتها:"تعالي شوفي حبيب القلب اش مسوي فيني"
بسمه ببرود:"قلت لك ياامل مااااالي حبيب قلب عشان انقذك منه"
امل:"وهالمزيون وش محله من الاعراب"
بسمه:"ماله محل من الاعرلب..."
خالد:"اذا انا مالي محل من الاعراب اش تصيرين انتي"
بسمه:"تقدر تقول انا ولااااا شي"
عارف خالد انها تقصد كلمته لها..:"شئ طيب ان الواحد يعرف قدر نفسه"
بسمه:"انا عارفه قدري ياخالد.... وحتى لو نسيت فيه ناس مارح يقصرون ويذكروني بقدري"
امل حست ان الجو مكهرب بينهم وشكلها بينهم غلط...
امل وهي طالعه:"اذا خلصتوا حديثكم الودي احنا تحت ننتظركم..."
خالد بعد ماطلعت امل:"البنت على وجه زواج صدقيني من تسمع كلامك تتعقد.."
بسمه:"قصدك من تسمع كلامك انت..."
خالد:"بسمه لا تخليني لك خصم لانك والله انتي الخسرانه"
بسمه:"اش بخسر اكثر مماخسرت ياخالد"
خالد وهو طالع:"الايام بتبين لك اش ممكن تخسرين زود يابسمه"
اول ماطلع جلست على الكنبه وهي تفكر في كلامه ماتدري ليش من بعد ماشافت رسايل عبير وهي تحاول تبعده عنها اكثر واكثر وتحاول تكرهه فيها...لمصلحة من لو خالد تبدل تقبله لها اللي كان واضح الى كره.......تنهدت وهي فخاطرها متأكده ان المستفيده الوحيده هي عبير استغربت ليش تساعدها بكل سهوله.......المفروض تكون هي اللي تتمسك في خالد لانها لوخسرته رح ترجع للحياه اللي تكرهها...خالد رغم كل مساوئه لكن يكفيها انها معه ماتحس بشعورالخوف اللي تحس به مع كل نبضه من نبضات قلبها من تسمع صوت عمها....



كان جالس مع امه وابوه هو يسولف وامه بس تضحك اما ابوه بس يكتفي بالابتسام...
ام فيصل:"ههههه حبسي الله على ابليسك...اسكت حتى الضحك من كثر ماضحكت كرهته"
فهد:"شوفي ابو فيصل اشلون مايحب يتعب نفسه اذا مره انبسط يالله وبالقوه تظهر الاسنان الاماميه"
ابو فيصل:"شكل ودك تشوف ضروس العقل"
فهد:"خاطري يبه...اشوفها...بس على فكره ظروسك للحين قويه في هالسن"
ابو فيصل:"قل ماشاء الله حسبي الله عليك من ولد"
فهد:"ماشاء الله الله يبارك لك في ضروسك قل امين"
ام فيصل:"آميييييييين"
فهد:"الله يمه طالعه من قلبك...ايه ماتنلامين حبيب القلب..."
ام فيصل:"فهد عيب هالكلام..."
فهد:"مافيها شي....(وهو يغمز لامه)اتذكر مره رفعت التلفون وانتي تكلمينه تقولين له احبك ياعبد الرحمن"
ام فيصل وهي تشهق وتحط يدها على وجهها:"انا قلته ياللي ماتستحي على وجهك..."
فهد حس انه زودها مع امه قال يقلبها مع ابوه:"بصرااااااااحه انا مو متأكد من صوت الحرمه اللي كان يكلمها ابوي اخاف تكون بس وحده ثانيه"
ام فيصل:"وحده ثانيه منو يعني..."
فهد:"ماادري يمه بس لا يروح فكرك بعيد.... تدرين الشرع محلل اربع"
ام فيصل بعصبيه:"فهييييد تدري انت اش تقول"
التفتوا على ضحكت ابو فيصل واللي نادر مايضحكها....
فهد:"(وهو يقلد لهجة الصعايده)الحقر نطئ يارقاااااله..."
مادرى الابضربه على كتفه من ابوه...
ابو فيصل:"ايا اللي ماتستحي تشبه ابوك بالحجر..."
فهد وهو يضحك ويحب راس ابوه:"اعذرني ياابوي من فرحتي بضحكتك....قمت اخربط بالحكي"
ابو فيصل:"مهو منك ...من اللي معطيك وجه"
فهد:"لا تزعل احنا ماصدقنا هالضحكه طلعت"
ابو فيصل:"ماعلينا متى تبي نخطب لك بنت عمك..."
فهد وهو متفاجئ:"أي بنت عم"
ابو فيصل:"كم بنت عم عندك مهي متزوجه...ولا لايكون حاط عينك على وحده ثانيه"
فهد:"لا وحده ثانيه ولا وحده ثالثه...بس انا اقول هي تدرس في الجامعه نأجل الموضوع شوي وعقب يصير خير"
ام فيصل:"حتى لو تدرس مايمنع تتزوج..."
فهد:"ادري بس اش اللي معجلنا ننتظر شوي وعقب يصير خير"
فهد فخاطره ودي اخطبها اليوم قبل بكره بس اخاف من الرفض واللي ممكن يترتب على هالرفض...