في البداية مبروك الوظيفة وفالك التوفيق
سؤالك كان .. هل ستكون هناك عقبات ؟ . لا أعلم عن اي نوع من العقبات تتحدث ولكن دعني أتحدث بشكل عام وانت اختر ماشت لأنني فهمت من حديثك بأنك لست من سكان محافظة الخفجي ..
في البداية اقول محافظة الخفجي محافظة صغيرة جدا" وستلاحظ بأن هناك العديد من سكانها هم موظفين شركات مثلي ومثلك بعضهم يعمل في الخفجي وبعضهم في الكويت وهم كثيرين جدا" وستلاحظهم مع الايام وربما تكون صداقه طيبة معهم لك وللاهل .
بالنسبة للسكن في الخفجي والاسعار .. أسعار الشقق كما أعلم من 12 ألف وانت طالع على حسب النظافة والحجم .أما عن اقرب حي للمنفذ أقول بشكل العام الخفجي كلها قريبه للمنفذ مساله خمس او عشر دقايق بالكثير لكن الاقرب اعتقد هو يسمونه حي الكيلو وهو حي الشمامره على حسب مااسمع هنا .
بالنسبة للمدارس في اهليه وفيه حكومية انت ورغبتك لكن ماعندي فكرة عن اسعار المدارس الاهلية .
بالنسبة للمشافي فيه مستشفى واحد حكومي سئ وفيه مشافي خاصة عبارة عن مستشفى واحد اسمه الخفجي الاهلي وعدد من المستوصفات لكن بشكل عام المشافي في الخفجي سيئة ..موظفين الشركات في الخفجي جميعهم يتعالجون في الكويت لايزورون مشافي الخفجي الا في حالة طارئة يستصعب فيها الوصول للكويت .
المراكز الترفيهية في الخفجي .. بشكل عام فيه الكورنيش ( جزء منه مرتب وجزء سيئ ) وفي مول صغير انشئته شركة ارامكوا داخل الحي السكني التابع لموظفينها وهو حي مفتوح للجميع وفيه مول ومجموعة مدارس بحي الخليج .. المول صغير لكنه امن ونظيف جدا" يعني لو تنزل اهلك فيه وتطلع الكويت ماعندك مشكلة لاتخاف عليهم عندهم اللي يحتاجونه من مطعم وصالة ترفيه ودورات مياه والمول امان في سكرتيه ..و فيه صالة مغامرات فيها لعب خفيفه للأطفال وفيه كوفي شوب حلو ونظيف يعني الاطفال يلعبون وانت تتقهوى بالكوفي مع المدام الله يحفظكم جميع .
فيه حديقة صغيرة مكانها مقابل البلدية الدخول اليها مجاني فيها لعب خفيفه جدا" في الفناء الخارجي وفيها شبك صغير فيه مجموعه من الحيوانات الخفيفه لكن شبك الحيوانات الدخول له اعتقد ب 3 ريالات .
بالنسبه للحريم فيه يسمونه القرية النسائية وهذا مكان ترفيهي على الكورنيش الدخول فيه للنساء فقط .
أما عن الكويت .. الفيحاء وحسب اعتقادي تبعد يمكن 100 كيلو من أول ماتدخل الكويت بعد المنفذ الكويتي يعني كمسافة هي قريبة لكن فيه شغلة ضرورية جدا" وهي ان فيه كثير من سكان الخفجي هم موظفين بشركة شيفرون في الكويت وفيه ايضا من سكان الخفجي يعملون مع مقاولين بنفس الشركة اضافه الى انه ايضا" فيه سعوديات يعملن مدرسات بالكويت وهن كثيرات جدا".. معنى كلامي هذا انك لازم تطلع قبل وقت دوامك بساعتين على الاقل عشان زحمة المنفذ لأن لو تأخرت ماراح تقدر تطلع من زحمة المدرسات .. وفيه فخ انته لايصيدك !! بالمنفذ خاصة الجوازات سواء السعودي او الكويتي انحش عن السيارة اللي فيها مدرسات سواء كانت باص او سائق خاص او جمس او ايا" كانت لاتوقف وراها ههههههههههاي لأن المدرسات السيارة الوحدة تحتاج تختيم جوازات ربع ساعة وعليك الحساب خخخخخ .
بالجوازات السعودي الله يعينك على الزحمة لكن لو عملت مثل ماقلت لك ماراح تتاخر على دوامك اما الجوازات الكويتي راح تلاحظ ان فيه طابور سيارات خاصه اغلبها جيوب او وانيتات دور الطابور هذا ووقف وراه هههههههه هؤلاء موظفين الشركات حتى لو كان طابورهم طويل لاتشيل هم راح يمشي كله بعشر دقايق بس !! لأن فيه بطايق خاصة لموظفين الشركات بس يختم ويمشي بسرعة البرق مو مثل المدرسات الله يصلحهن على الزحمه ههههههههاي .
بالنسبة لبنزين السيارة لاتعبئ من الكويت عبئ من السعوديه لأن بنزينهم غالي وراح تلاحظ الكويتيين يعبون من المحطات اللي عند المنفذ .
الحين وقت امطار وخيرات عشان كذا فيه مخيمات منتشرة على جوانب الطريق بالخفجي لليجار اليومي في الزين وفيه الشين وايجار يومي تقدر بالويكند تاخذ مخيم تغير فيه جو انت والاهل والاولاد يلعبون بالبر ( عادة المخيم يكون فيه كهرب وتلفزين ولمبات وحمام وحطب ) شغل مرتب والمخيمات تختلف ..
هذي ياغالي معلومات بشكل عام اجتهدت في طرحها لعلك تستفيد منها شي ولو قليل لأنك لم تحدد اي العقبات تقصد واجتهدت باعطائك فكرة عامه .. أتمنى ان اكون افدتك ولو بالقليل
وان اردت اي استفسار لاحقا" اطرحه هنا او في موضوع جديد لكي انتبه له واجيبك مباشرة باذن الله