واحب مصر
ضلوع بتتشوق لنيلى
وتروى طمى اللهفه
من وردة حنينى
احبها قد ابتسام الشوق
فى اوردة التوحد
واحبها
نسمة ربيعى للمهج
واحبها عسل الامانى
فى تسابيح اشتياقى
تناهيد وليده بتكتب عشقها
حرفين ندى
وحرفين صلاه
وتلات حروف متشبكين
دمى
شراين غنا للعشق يتوضوا
بين زمزم الايام
وروضات الصبا
والخدمه ميرى
فى صحرا تكوينى
طوابير بتحكى الشمس
لليل المسافر
تواريخ بتطلع من سما
عيون الصحاب الطيبين
وبيوت فقيرة بتستحمى بالذكر
تسابيح وضى وفجر لسه بيتولد
فى ايدين رضيع
من ننى عينه قصيدة الاكتمال
واحبها بقد الشجر
على شط ايامى
وبقد نخل صعيدى
بيحاكى الصفاء
وبحبها لولى فى حوارى الصيف
والقاهره بتحبى باناملها فى ضلوعى
واسكندريه صبيه نعسانه
بتشطف عينها فى موالى
عنب السويس النبيتى
ف ضحكة اصحابى
تقطفنى لمسة ساحره
من ضى اورادى
من نهد ايامى
من شهد مهد الصبا
ولحد احلامى العفيه
بمجد بينبت
ووجد بيثبت
اللحظه فى عروقى
عشقى ومعشوقى
والشيخ محمد رفعت
والنقشبندى
وقلل قناوى
فى السيده زينب
واربع عساكر جيش
فى محطه المترو
وتلات بنات من جامعة المنيا
وعلم على جبينى
فى التحريريودينى
من بين السموات الرحيبه
يرسينى
قمرابتسامى ف قمح اطفالى
بساتين رضا ضحكة قناديلى
حداد جاهين والست على مكتبى
ندهة عصارى مافوق السد تجمعنا
ترجع تدمعنا تانى