كورونا الخفجي
يذاع الخبر والناس كلٍ يشوته شوت
ياليت الخبر مافيه ودوا ولا جابوا
ولانعلم اللي فيه اشاعه وفيه ثبوت
وسائل بعض الإعلام حابوا ولاحابوا
كُورونا غزى الخفجي وصرنا نشوف الموت
يزيد العدد بين اشتباهات وان صابوا
احد مات فيها واحدٍ راح بالتابوت
توفوا ثلاثه والمصابين ماطابوا
فتك بالاوادم وانتشر يشبه الطاغوت
مصير البشر في واحدٍ فيه ماخابوا
نواسيك يالخفجي ولاطاح غصن التوت
جميع الاطباء شمروا لك ولا هابوا
غدت كن مافيها سواعد وكسب القوت
لثام الوقايه رمز للي بها نابوا
حزينه شوارعها وخف الزحم والصوت
تنشّد عن اللي عن مساحاتها غابوا
يمر النهار وينتهي يومها مكبوت
من المشهد اللي صار من شافه رْتابوا
نمر المداخل والمخارج وبس سكوت
شعور الاهالي من قبل شيبهم شابوا
غدى العمر بعيون الاوادم غدى محتوت
من الهول واللي يسمعون ولقوا ذابوا
اقوله وانا شاعر لاشامت ولا مشموت
ولاني من اللي ثاروا الوضع وغتابوا