تثني واغضبيهن مع دخولك صالة الافراح
بنات الحفل قدامك يجنن من يشوفنّك
يشوفنّك ومنهن ينزعج والا يقوم وراح
ماهو كره وعدم تقدير لكن غيرةً منّك
ليامنك جلستي انتي الجمهور والمصباح
حريمٍ في جمالك يسمعٍ ماصدقن جنّك
ولو ان الجماد يحس مايدفع ولاينزاح
جميع الطاولات اللي على دربك يضمنّك
تخطي بينهن تخضع لك الأجساد والأرواح
الا قايدة عالم جمال الغيد في سنّك
على اكتافك يطيح الليل والا فوق ردفك طاح
زوايا خصرك الجذاب عن ردفك يعزلنك
ليامنّك لبستيه الذهب فيك الذهب يرتاح
وغيرك يلبسنه والذهب باسمه يسمنك
وعطرك ينتشر لحظة قدومك ريحه الفواح
محلات العطور اللي يبيعن عطر يهدنّك
وجودك عزز اسواق النساء ويزوّد الارباح
تراجع بورصات السوق دايم مايهزنّك
تباهي فيه زينك والتفاتك بالنظر لماح
يعبّر عن فَخُامة هيبتك واسلوبك وفنّك