[align=center]أعضاؤنا الكرام فضائح منتدى .. ليست هنا في منتدانا
وإنما وجدتها في كثير من المنتديات ..
أتمنى ان تعجبكم ولا يظن ظان اني قاصده بها شخص بعينه
فقد حددت مناصب معينه فلو اني قاصد لما حددتها
وإنما حديثي عام وشامل هي رؤية نقديه قد تصيب وقد تخطيء
فضيحة منتدى (1 )
تستعرض ايميلك مثل كل يوم وفجأه تحصل دعوه من منتدى فلاني تقول خليني اجرب وشوف
بضاعتهم ... وانت بالطريق علشان تشوف هالمنتدى تقول بينك وبين نفسك من اسمه شكله حلو
والظاهر انه زحمة اعضاء ... تدخل على اللنك وانت متشوق فجأه يقولون لك ترى غير مصرح لك
بالدخول تحط ايدك على خدك تقول وين الضيافه ... الحين مو جاني دعوه منهم ...
طيب ليه يسكرون الباب بوجهي يمكن كرم جديد مالحقت عليه " كرم دوت كوم "
المهم سجلنا بعد مااخترت هذا الاسم الرنان واقول بيني وبين نفسي عسى مايصير محجوز لان
المنتدى واضح انه مزحوم يوم سجلت واخذت الموافقه فرحت كأني جايب الدكتوراه ...
يوم رجعت قالي خير وين تبي رح لأيميلك فعل اشتراكك ياحلو قلت انت الحلو والعم والخال وكل شي
بس فكني ..... فعلت وجيت طاير من فرحتي نسيت وش اسمي اشوى بثواني تذكرته وكتبته
خفت انساه يزعل علي صاحب المنتدى فتحت المنتدى قلت بسم الله ولا قلعة السندباد
مليان من هالاقسام يمين ويسار فوق وتحت قلت هذا الزين وينك من زمان اناظر يمين ويسار
مااشوف غير زول بعيد قلت هذا الذيب راعي المنتدى قربت حوله قلت: وين دربكم يافلان ابي طريق
الاعضاء بسلم عليهم قال :اي اعضاء ياضيفنا قلت اللي محركين مضاربكم قال : تراك سلمت
عليهم قلت : شلون سلمت وانا ماسلمت قال ياصاحبي انت سلمت علي و مافي غيري عضو وانا
صاحب المنتدى ومشرف المنتدى وانتي الثاني جابك الله تساعدني قلت افا هذا علمكم
ساحبـيـني من أخر الدنيا واخرتها يصير اسمي عضو على بساط الفقر.. طيب ياحسرتي ليه مسكرين
بابكم ولا عاجبكم طبعكم تلعبون على العضو لين يطيح بدريكم ..
اقول يالنشمي طالما هذا طبعكم تراني ماني من ربعكم
ههههههههه من جد فضيحـــه
فضيحة منتدى ( 2 )
عضو من أبرز رواد القسم الاسلامي .. تشوفه تقول هذا مابين المسجد والمنتدى ..
وفجأه ........ تشوفه اكثر واحد يفتي عن المطربين والمطربات .. ويعطيكم علومهم كامله ..
ويستشهد بأغنايهم .. وهواول من ينقل اخبارهم أو يشارك في مواضيعهم وبكل شراهه !!
شلوووووووووون تصير هذي ؟؟ ......... من جد فضيــــحه!!
فضيحة منتدى ( 3 )
مشرف نايم .. يدخل بالشهر مره ..وصبرت عليه الادراه باعتبار ان يمكن عنده ظروف وبيتعدل ..
طالت المده ومافي أي تغير والقسم اللي هو يشرف عليه بدى يضيع وينزل مستواه ويتدهور ..
فيضطر صاحب المنتدى يقوله : تسلم حبيبي ودنا نعفيك من الاشراف وما قصرت..
يزعل ويقلب الدنيا فوق تحت ... يعني يا اصير مشرف ولا بطلع ..!!!
يا تخلوني صورة اتدلع .. ولا ما ابي منتداكم .. "الحمد لله والشكر " من جد فضيحــــه
فضيحة منتدى ( 4 )
عضو واعي .. صاحب فكر .. ناضج .. بكل حسره يتصفح بالمنتدى ويتمنى انه يشارك عشان يفيد
الاعضاء باللي عنده من معلومات .. المسكين مالقى قسم يحتويه ويحتوي فكره المثقف ...
توجه لقسم الملاحظات طالباً افتتاح قسم بعنوان الثقافة العامة ....... صاحب الموقع لما شافه
سوى نفسه ما شاف .. وقال في نفسه : وش يبي هذا ابو الثقافه والفلسفه والخربطه ؟؟
وسبحان مقدر الاقدار ..الموضوع اللي تحت موضوع هذا المثقف في قسم الملاحظات ..
عضوه صغيرونه .. نزلت موضوع طالبه قسم للالعاب والفكاهة..
الردود عليها صفحتين .. والجميع مؤيدين ... وصاحب الموقع فتح القسم في خلال دقيقتين ..
وأبو الثقافة ينتظر أحد يرد على اقتراحه المسكين .. بس لا حياة لمن تنادي يافطين ..
من جد مو فضيحه إلا فضيحتين ...
فضيحة منتدى ( 5 )
عضو ياحبي له .. يكتب من وحي عقله .. يتعب عشان الفكره .. ويتعب عشان رونق الجملة
لو بيدي .. كان بست راسه .. وفي النهاية يطلع لنا بموضوع قمة في المنطق والفهم والرأي السديد ..
وكأني اشوف عيونه مع اول رد.. كيف تبدأ تتحرك عيونه بسرعه عجيبه من الألم ، والحسره ..
يجيك ذاك العضو .. ( المنشغل بزيادة عدد مشاركاته ) ويرد .. الله يعطيك العافيه !!
المشكله هو طالب مناقشه مو طالب شكر ..... يا بعد عمري الله لا يضيع تعبك ..
وعضو ثاني .. غير الاولاني .. يدخل موضوع طوووووووووويل طبعاً مستحيل يقرى الكلام كله او
حتى مقطع منه ...ويرد بعجاله ويقول : شكراً على الفايده ماقصرت ..
واخرتها وش يطلع الموضوع ؟؟؟
واحد قاعد يسب في ديننا .. ويتعرض لرسولنا ... وهالعضو يقول له " شكرا ً ماقصرت .."
من جد فضيـحــــــــة .. إلا فضااااااايح [/align]