[خلف الكريّع]

بسم الله الرحمن الرحيم

السلام عليكم ورحمة الله وبركاته

وجودي بينكم إضافة أعتز بها ، وفرصة سعدت بنوالها لمصافحة قلوبكم عن قرب ..

شكراً لابن العم محمد والكريم أبا رائد لدعوتهم الفاضلة .

وأتمنى أن أستحق مودتكم ..

[poem=font="Simplified Arabic,4,blue,bold,normal" bkcolor="transparent" bkimage="" border="none,4,gray" type=1 line=0 align=center use=ex num="0,black"]
حبيبتي حسنها متمرّد وصابي=يتكلم الحسن فيها كنـّها لسانه !
لو اختصر وصفها واحيّد اعجابي:=هي الجمال انخلق في صورة انسانه !
.=.
في حسنها يلتقون ( اعداي واحبابي ) =اخاف غدره .. وماني قد نسيانه !
تعبان في قربي ! وتعبان بغيابي ! =من يهجر احبابه ؟ او يامن لعدوانه ؟
.=.
ياعم .. لا شفتها ما ترمش اهدابي=كأن من شافها تتخاصم اجفانه !
في وجهها كل ما يطري على نابي=من خوخه .. لتوته .. لحبات رمانه
مزيونة ٍ كل ما لاحت لي القى بي=قصايد ٍ في بحور العشق غرقانه
.=.
ياعم .. لمّا تسولف تحرق اعصابي != مخارج حروفها : ثملى ونعسانه !
تحكي - وانا من غنجها سايل لعابي ! - =وبصوتها ( رعشه ) ولا هيب بردانه !
في طيّب انفاسها / ضاع أنفس اطيابي=وبشفاهها / ضاع طعم التوت والوانه
.=.
يا عم .. بعيونها ( غي ) يْتسلابي=بعيونها ( طهر طفل ) و ( كيد شيطانه )
فيها ( صباح الحمام ) و ( ليل الارهابي ) =براءةٍ تشتكي من ظلم وخيانه
ليل يْتربّص بي / وصبح يْتعزوا بي=وبدر ٍ طعنه الظلام وحاصر اركانه !
.=.
كأنني مع شعرها ( شيخ : متصابي ) =وكن الهوى معه ( طفل ٍ : عز سلطانه )
له : رغبة السادي / ولي : نية السابي=وان فرّعت كل منـّا جنت جنانه !
نسيمه يصيح بي : لا تلمس العابي=وانا اتعمد مغابشته وعصيانه
اللي - نوى ياخذه - باقـنـّه ثيابي=وانا مع ثايبي اتهاوش على شانه
.=.
ياعم .. لو شفت منظر صدرها النابي=( نونين كوفيتين ) وبينهن ( خانه )
او هن ( صدفتين ) لبسن ( تاج عنابي )=( ومحارة ٍ - كل فلقه - وسطها دانه )
متزاعلاتٍ وهن جيران واقرابي !=واليا مشت .. كل ٍ يدافع عن اوطانه
لهفي على / سَحْرها لو كان : مشرابي=ولهفي على / حجرها لو : نمت باحضانه
في جسمها لبعضها عن بعضها تحابي=أجزاء جوعا بها .. وأجزاء شبعانه !
خصر ٍ ( مسيكين ) تحته عجز ٍ( مرابي ) ! =وساقين عطشانه .. وفخذين ريّانه !
من وين ما شفتها يبلغني مصابي=ما فيه شبر ٍ بها ما طحت بادمانه
نقص ٍ - مهو زود فيها - عـنـّها هابي=وزودٍ - يُرى نقص - ما تتقبّل احسانه
.=.
يا عم .. شف حسنها وشلون سوّابي ؟!=شف كيف صدع الجبل لا ثار بركانه ؟!
شفني - ليا من طرت - كيف اترك اصحابي ؟!=شف كم لها عيني من الشوق سهرانه ؟!
ياليتني - يومها دقت على ابوابي-=عيّيت لا افتح لها قلبي وبيبانه
ولا اعطيتها واجب اسلامي وترحابي=وسكّرت حتى قبل ما اقول غلطانه
وصديت عنها وهي ما تعرف اسبابي=صدة كريم ٍ حشم عورات جيرانه
ما عاد تنفعني امجادي .. ولا القابي=غادرت عز القصور / لذل زنزانه !
جتني وانا .. شيخ قوم بعين شيابي=وراحت وانا .. طفل بعيون اصغر اخوانه ![/poem]



مع ودّي "


خلف