[align=center]هـرج الـخـطـأ "
ياللي تشوف الكلام يزيـن منطوقـه
الهرج فن ماكل النـاس تعـرف لـه
كم واحد من سكوته ضاعت حقوقه
وكم واحد لو يسكت يمكن اصرف له
الهـرج لازل حـده تكثـر فتوقـه
وتصير مثل السهوم اللي على غفلـه
اذا مصادر علومـك غيـر موثوقـه
اقفل عليها بصدرك و أحكم القفلـه
احذرعلـوم مـن النقـاد ملحوقـه
تفك بـاب صعيـب يتعبـك قفلـه
خلك نبيه و حكيـم مرتفـع ذوقـه
اليا نطق لـه كـلام ماتحسـف لـه
وخلك وفي للوفـي ويـاك والبوقـه
والا ردي السوالف لاتضاعـف لـه
ترا الخطا ماربح من طب فـي سوقـه
يكلف الرجل شي مـا تكلـف لـه
والمزح خارج حدود المزح لاتسوقـه
يصير صاحبك يحلف لك وتحلف لـه
الكلمه اللي بوسم اللـوم مطروقـه
ان قلتها حطتك في وضع يوسف لـه
امـا يجـي ردهـا ماينصبـر فوقـه
ولا سفهك الجليس اللي تسولف لـه
شعر / كامل الحليلي السلمي
[/align]