إعترضني وإعترض حتى إعتراضي
................. قـلـت لـه ياســــيدي والله تمـــون
من يقول إني أضــيٌع وقــت فاضي
................. ومـن يقـول إنك على قلبي تهون
كنت أقول بغيـبتك تمـحــل فياضي
................. كنـت كنـت بعـودتك مـثل المزون
لاحــظ اللي يقــطع ديار وأراضي
................. لـو تـغرٌب لـلوطـن يبـقى حـنون
جيت مدري كيف باسلوب إنتفاضي
.................في كـلام ٍ حطٌــم أركـان السكون
سالفــة مـبدا ولا تـحتاج قـــاضي
.................ما تخالف عند واقعها الضنون
كنت أحبك يعني إنك كنت راضي
................. إن بكـره يمـكن إنـي ما أكــون
ياحلو ما ( كنت ) ماضي بإفتراضي
................. حــاول تركـز فـدا ذيك العــيون
لو حسبنا ( كنت ) فعلاً فعل ماضي
................. كـيف نبغى كيف حاضرنا يكون
والله انـي معــك بأخـلاقـي رياضي
................. والله انـي فـيـك مـغرم للجــنون
نايف العــنزي