[سـَمآ ♪]

[align=center]
ياطير قل لي وين عصرٍ مضالك
وش بدل احوالك وغيّر علومك
من عقب ما زان الفضاء بتجوالك
وما أكثر على روس المراقيب حومك
ومن عقب ماكان الفضاء لك حلالك
وتلعب على كف الهواء طول يومك
ياما الهواء ياطير حطّك وشالك
ويفرح بشوفك ويتحرأ قدومك
ولا أحدٍ تجرّا يوم يدخل مجالك
كلٍ يهابك من منايا سهومك
قد كنت تفعل كل شيٍ بدالك
والكل من عطفك ولطفك يرومك
واليوم اشوفك صدق مشغول بالك
ياطير قل لي وش سبايب همومك
قل لي وش للي في حياتك طرالك
هو ليه ماتقدر تهنّا بنومك ؟
أن كان جور الوقت ياحرّ طالك
ولاعاد ينفع مع بقايا سلومك
معذور لو تجلس بوكرك لحالك
والله يلوم اللي بحالك يلومك
وجعل السعد والخير ياحرّ فالك
والله يخفف عنك باقي همومك


الشاعر
عبدالعزيز السليس
[/align]