الى متى وانا اهين الوقت وارجع واحشمه
وانا على رجع الوصال اشرف وانادي وارتقب
ياام العيون الفاتنات الناجلات المغرمة
يامن رموش عيونها تشكي سبب عكش الهدب
يامبسم له ضحكة تنطق بشي تبهمه
يانبرة لامن حكت كل المعاني تنقلب
يللي خذيتي خافقي قبل اعرفك واقدمه
يللي غيابك لحن تغنيبه اعواد القصب
عودي على قلب طواه الهم والشوق هزمه
قلب معك غنايمه ضاعت ولا ادري وش كسب
أنا انتهيت وشوقي بصدري بدت له همهمه
جمر في ظاري سندت ناره وانا صرت الحطب
حتى ثمر قلبي تدلى قبل ياتي موسمه
هزي طرف جذعه تساقط لك من عذوقه عتب