تسعه .. من بعد الأخير
بوابه رئيسيه
عليها الناس ملتمه
بالعشرات .. قل ميه
لفت أنظاري ذاك اللي
واقف .. وقفة بنيه
سألته .. ليش هالزحمه ؟
قال العيد .. لا يفوتك
إلحق .. زاحم .. إدخل
وإحجز كرسي بالمقهى
شخـّص .. وإضبط الجوال
على نغمات عصريه
واهمس للي بجنبك
أمانه .. لو تمر البنت
هذا رقمي يالنشمي
دق ... وطوّل شويه
تسعه ونص .. بعد الأخير
بوابه رئيسيه
دقيقه .. ثم بدى المنظر
يصير أمواج لحميه
منظر .. مااعتقد بيكون
لو إن المنتخب يلعب
بكأس العالم الليلة
مباراته النهائيه
لقيت إثنين .. ماادري
ياعلماء .. ياأخطر ؟
صحيح إن النشاء .. كيلو
بس الحق ... شخصيه
رحت أمشي وأراقبهم
فضولي مايخليني
وش اللي الحين جايبهم ؟
وش اللي همهم بالناس ؟
هي وحده من الثنتين
يانظرة لحال السوق
ياحمله دعائيه ؟
قرّبت ... وبديت أسمع
يقول أحمد : أنا ياسعود أواعدها
ولا أوفي بمواعيدي
وإذا حسيتها بتخرب
أهددها بصورتها
كذا أمسك خيوط البنت
ولازم .. تقتدي فيـّه
قال سعود : أنا أشهد لك
ذيب .. وماعليك خلاف
خبير .. تفلسف العذرى
ولا تصدق لها نيـّه
عشره والدقايق عشر
مقهى بطابق ٍ ثالث
كراسي فاضيه بعيني
عليها رجال .. وهميه
دفعت حساب فنجالي
وأنا مصدوم بالواقع
نزلت الطابق الثاني
وصلت الطابق الأول
لقيت الناس ملتمه
على واحد .. يقال إنه
ذبح إخته .. وبعضهم لا
يقول أمه
قربت شوي .. ناظرته
ياالله .. ياالله سبحانك
هذاك أحمد .. رفيق سعود
مثل مادق باب الناس
بابه .. مابقى مردود
شخص ٍ ذابح ٍ إخته
عليه الناس ملتمه
بالعشرات .. قل ميـّه
وبوابه رئيسيه