اسري على نور القمر لا ادبح الليل
لاناموا اللي ماضروا بالمساري
وابعد ولي نظره ورى الجدي وسهيل
ماني على الهقوه قريّب محاري
اخذ ولا اعطي عن حياتي تفاصيل
واعلن مع السجات دوم انتصاري
لاسولفوا نقالة القال والقيل
اترك مجالسهم واحدد مساري
واميّز الفارس قبل ميّزة الخيل
احدد احجام البشر با اختياري
واللي يخطم السالفه دوم ويعيل
غشيم ماهو عن اهل العرف داري
من بيني وبينه قطعت المواصيل
ما ابيع في سوقه ولانيب شاري
اروح والدعوى ياراسي تساهيل
واشعل على روس المنيفات ناري
سويت لدروب العلاقات تعديل
مخرج على الراحه ومخرج طواري