رثاء في جميل عيد الشمري رحمه الله
ياعيد مات ابوك والموت مكتوب
حزني مع حزنك على ابوك ياعيد
جاني خبر موته ماهي نشرة قروب
ماهوب اشاعة واصبح العلم تأكيد
ليت الخبر جاني مزّيف ومقلوب
ماهو صحيح وفيه الاقوال ترديد
ياعيد مات اللي مقدر ومحسوب
النادر اللي في شفوفه مباعيد
عشرين عام وخوته مابها عيوب
في خوته ماشفت منْه المناقيد
هو فرد لكن عندي دول وشعوب
مادمت حي ابذكره دوم واشيد
دمعي على فرقاه ياعيد مسكوب
والصدر عبراته تزيد التناهيد
يبكيه الاجفر صوب والخفجي بصوب
يبكونه اللي ينحرون المفاريد
يبكية فنجالٍ على الطيب مصبوب
يبكي على فقده وجار البغاديد
يبكنّه الالغاز في كل مسحوب
والشعر يبكي مع جميع القواصيد
تذرف عليه عيون والتاعت قلوب
في حزةٍ ماعاد له فيه تمديد
عساه يوم الحشر ماهوب مطلوب
ومخلدٍ في جنة الخلد تخليد