|
لا تــزال [ شركة الفصلات ] في أعذارها ..!
[align=center]بسم الله الرحمن الرحيم
يقول المثل
[ شر البلية ما يضحك ]
وأنا اقول ان الشركة ما ادري تضحك لي ولا تضحك علي ولا تضحك على نفسها
ولا وش السالفه ..!
هذا انا جيتكم بموضوع الجديد عن شركة الإتصالات السعودية
الحائزة على الجائزة المقدمة من نفسها
وبذلك أصبحت الشركة الكبيرة ذات المصداقية المتناهية
شركة الإتصالات //
تحبون ابدا ولا .. أدخل في الموضوع << نفس الشي يا مجنون
مجنون من هالشركة [ شركة الخبول ]
كل واحد يضحك على الثاني
وكأن ردودهم معادة على جهاز تسجيل
انا اعلمكم وش القصه
تذكرون في موضوعي القديم
[ يمكن زيارة الموضوع من هنا ]
معاناتي مع شركة الإنفصالات
انا قلت ان الدي اس ال ركب عندي بعد انتظار دام ( سنتين )
وبعد هذه السنتين صارت لي مشاكل حتى تم بحمد الله التشغيل على شكل لا بأس به
يعني يمشي الحال
وانا بصراحه كنت مبسوط ووصلت لـجارنا كيبل
وعيال الحاره جو يهنئوني بهذا الدي اس ال
صراحه كان إنجاز كبير من هذه الشركه وشي غير المتوقع وغير العادة
عالعموم بعد مرور قرابة الشهرين
فجــــأة
ويتم فصل الدي أس أل
راح أول يوم /// مافي إشارة DSL
راح ثاني يوم /// مافي إشارة DSL
ياولد وش السالفه
قلت خلنا ندق على 907
أشتقنالهم
ولا الظاهر هم اشتاقولي
صارلهم شهرين ما احد أزعجهم
المهم اتصلت عليهم
وكلمت موظف الأعطال ان عندي مشكله في الدي اس ال وان الإشارة ما تشتغل
ماقصر بصراحه ورفع لي شكوى
قال خلال 24 ساعة راح يجيك رد من الفني عندكم
قلت نصبر عادي .. صبرنا سنتين ما نصبر يوم ؟؟؟
المهم نمت .. صحيت .. ولا جوالي يدق بعد الظهر على ما اعتقد
ولا هو رقم ثابت من الخفجي ..
الفني : السلام عليكم
الــســامــر: عليكم السلام
الفني : أخوي انت رافع شكوى بخصوص عدم وجود إشارة DSL .
الــســامــر: أيه نعم اخوي صحيح
شوفوا عاد وش الرد ..
وش راح تتوقعون بالله
تتوقعون يقول //
ان شاء الله يومين والإشارة تكون عندك تمام
أو
هذا خطأ فني بسيط وأن شاء الله جاري التنفيذ على إصلاحه
أو
ماعليش على هذا العطل .. وأبشرك تم الإصلاح
لا والله
لا ثم لا .. ثم ألف لا
كان الجواب الغريب العجيب الغير متوقع أبدا
الفني : أنت أصلا ما عندك DSL .
بالله وش رايكم بالرد ؟؟
الــســامــر: كيف ما عندي DSL
الفني: هذا الي موجود عندي
الــســامــر: طيب انا شغال قبل يومين عليه كيف ؟؟
الفني: [ ؟؟؟؟03766] بأسم فلان الفلاني انت ما عندك دي اس ال .
الــســامــر: كيف ما عندي وانا اقولك شغال قبل يومين
وطالبه قبل سنتين
وما شبك معاي الا شهرين ؟؟
الفني: [ ؟؟؟؟03766] بأسم فلان الفلاني انت ما عندك دي اس ال .
الــســامــر: يا ولد وش فيك انت .. تفهم ولا لأ ..؟
الفني: انت داق تتهاوش ولا داق على شان المشكله
بعد ذلك بدأت المشاكل والكلام اللي اله داعي
أخلاق الموظف كانت رايحه في الرحله
يعني [ شين وقوي عين ]
فاصلين علي الخدمه بدون سبب .. ويرفع صوته
لكن ما قدرت أتوصل معه إلى حل ..
قال لي : شف دق على 907 وقولهم عن المشكله انا ما اقدر افيدك
المهم بعد الجحده القوية الغريبه .. دقيت على 907
السلام عليكم //
أخوي انا عندي DSL والإشارة ما تطلع ودق علي الفني يقول ما عندك DSL
شوفوا وش رد الموظف .
الموظف : لحظات أخوي .
الــســامــر : خذ راحتك .
الموظف: اخوي عندك DSL
الــســامــر: وش في خويكم يقول ما عندي .
الموظف: مادري .. بصراحه إفادة الفني غريبه وانا راح أرفع طلب وان شاء الله راح نعالج المشكله.
المهم دارت السوالف ورفعت شكاوي لمدة أسبوعين وانا أرفع وانتظر وما القى جواب
مع العلم :
أنهم يقولون لي .. خلال 24 ساعة راح يردون على جوالك ..
وأنواع السحب .. ومن شكوى الى شكوى.
الى ان دقيت على مركز الشكاوي
8002444455
ورفعت شكوى .. وقالوا شي غريب بصراحه كيف كذا .... الخ
قالوا لو ترفع شكوى من عندنا لازم تنتظر 72 ساعة أي [ 3 أيام ]
قلت ما في اي مشاكل نصبر ..
راحت ثلاث أيام .. واتصل لك عليهم
السلام عليكم ..
وش صار على الشكوى ..
قالولي //
احنا حولنا رقمك على المشرف وإن شاء الله راح يكلمك قبل انتهاء الدوام الساعة 3:30 العصر
راح اليوم الأول وما احد اتصل وكان يوم الثلاثاء
اتصلت يوم الأربعاء .. قالو نفس الكلام الأول
راح يوم الأربعاء ...
يعني ..( شوفوا أنواع الجحد ) مافي أي أثر للمصداقية مع العملاء
الحين مالي الا انتظر يوم السبت وقت الدوام
واتصلك على هالشركه
كيف يابوي تقولون المشرف بيتصل .. وما يتصل مو اول مره ولا الثانية
قال // ماعليش ....... ( أشتغل شريط الأعذار )
المهم قالي راح يدق وما دق ..
اخيرا دقيت ونشبت .. قال دقيقه راح احولك على المشرف
مع ان اللي قبله يقول ما عندي [ زر ] للتحويل على المشرف.
رد علي المشرف ..
وماقصر يمكن رفع لي 4 شكاوي في رساله وحده يعني شكوى ما فيها كلام
..
ارتفعت الشكوى والحمد لله بعد مرور أسبوعين أبشركم ان الدي اس ال ما ركب 
دق علي خوينا الأول :
قال: انت فلان ولا ولده
قلت: هذا يبي يناسبنا الظاهر . [ ولده ]
قال : ياخوي انا قلت لك من قبل ما عندك DSL [ وقتها كنت نايم ]
قال: أسمع ... لا تدق على الأعطال .. انت اساسا ما عندك DSL اذا تبغى اطلب DSL .
قلت : ياخوي طيب كان شغال عندي.
قال: ياخوي ماعندك .
الوكاد قفلت بوجهه والله ما كنت رايق ولا كان خربت الأوضاع.
[[ ورفعت شكوى ]]
كان مقتضاها ان استياء العميل من رد الفني .... الخ
قلت أقول // طفشت من الشكاوي عطونا حل
قل مالك الا تدق على الجبيل والإدارة راح يفيدونك
قلت عطني الرقم
عطاني الرقم
بالله تتوقعون من رد ؟؟؟
اللي رد علي طلع بنغالي
يقول : سبيك انجلش
قلت : أقول عربي
قال: مافي معلوم
قلت وين مدير
ما ادري وش قال عاد
شوي ولا واحد رد علي
قلت السلام عليكم
ما ادري وش قال
الوكاد الي فهمته
ان الرقم اللي أعطونياه
رقم
فندق في الجبيل
والى هنا
توقفت ..
ووقعت من إثر الصدمة الكبيرة ..
أي شركة وأي جوائز وأي إعلانات وخرابيط
عايشين علينا
ولكن لا يأس مع الإتصالات
وهذا هو التصميم الي عملته لهم في منتدى التصاميم
أهداء تصميم [ لشركة الإتصالات ]
ولي عودة لإستكمال الموضوع .. اذا تم التجاوب
ولو تلاحظون في الموضوع :
سوء أخلاق - كذب - مواعيد خاطئه - عدم وجود مصداقية - تصريف غير متوقع
طيران - إقلاع === مع شركة الانفصالات
هذا وبالله التوفيق[/align]
آخر تعديل الــســامــر يوم 28-10-2008 في 07:22 AM.
|
المواضيع المتشابهه
~~ وفقك الباري ~~
العرض العادي
