رد إدارة كلية العلوم والآداب للبنات بالخفجي على الشكاوي المقدمة من الطالبات

[الديــم]

عزيزتي كليه الاداب والعلوم بالخفجي ..

أولا : من ناحيه تقديم شكوى رسميه لاداره الكليه .. انا اللي اعرفه ان الكليه المفروض تخصص شي يريح الطالبات وهو صندوق الشكاوى والاقتراحات وجزاكم الله الف خير حطيتوا لنا صندوق صغير بس المشكله انكم قافلينه ومضيعين المفتاح لان من العام وانا وكثير من زميلاتي وبالضبط عدد زميلاتي خمسه كنا نكتب شكاوينا فيه وللاسف محد نظر بحالنا .. أما من ناحيه اننا نقدم شكوى للاداره واتوجه شخصيا لهم احنا من نداوم ما نلاقي غير معدل ساعه تقريبا وقت فاضي عشان نروح نفطر فيه ما بين زحمه المحاضرات فمن الطبيعي ماراح نقدم شكوى لانه راح ياخذ منا هالموضوع شهر كامل مراجعات عشان ينتهي مع احتمال كبير انه يكون حل سلبي ..

ثانيا : اللي يقولون ان شكاوينا تافهه من ناحيه اللبس .. طبعا اكيد بالنسبه لكم تافهه لانكم ماجربتوا تعب السوق عشان تدورين شي يناسب شروط الكليه .. مايبون لبس عليه كتابه .. ممنوع القطعتين .. ممنوع التيشيرت باكمام قصيره .. قميصك شفاف ..بالاخير راح نشتري قماش ونفصله عند الخياط عشان يكون لبس رسمي يوافق شروط الكليه والانظمه ...
انا ماابي ان اللبس يكون قصير ولا نص كم .. لكن على الاقل اسمحوا بالقطعتين عشان نقدر نلبس ملابسنا اللي عندنا ..
وطبعا بغض النظر عن التناقض في قولكم ان التيشيرتات اللي عليها كتابه انجليزيه ممنوعه عشان الانسان لازم يكون فخور بلغته العربيه اليوم الاربعاء بنت لابسه تيشيرت وكانت الكتابه عربيه (( كلمه براند )) هذا بالضبط اللي مكتوب مع حكمه عربيه مأثوره ومع ذلك وقفت برا البوابه نص ساعه وكان السبب في ذلك وقول موظفه الامن لها لما سالتها عن سبب المخالفه :: والله الكلام المكتوب كثييير ..

ثالثا : الكافتيريا هنا الطامه الكبرى لما تقولون قدموا لنا شكوى رسميه .. شي الاعمى يشوفه وكيف انتوا اللي تداومون ماتعرفون احنا مو نظام مدارس عشان يقون وكيل الكافتيريا اللي تتعاقدون معاه غيرتوه ومحد اشتكى >> الموركي وفطايرهم والحين طايحين لي بفطيره لوزين تصبيره ... جمييع الكليات والجامعات في السعوديه وخارجهاا يكون مبنى الكافتيريا عباره عن تجمع مطاعم >> كنتاكي و هارديز.. والخ .. وانتم حاطين لنا دريشتين تبيعون فيهاا لجميع طالبات الكليه .. ربنا ماشفناه بس بالعقل عرفناه

رابعا :: بخصوص البوابه والامن اللي يلاحقون الطالبات بالممرات انزلوا تحت اطلعوا برا ومن هالكلام ترا مافيه ساحه ننزال لها أما البوابه انا مثلا عندي محاضره الساعه 8 الى 10 ومحاضره 12 الى 2 .. الوقت الفاضي اللي من 10 الى 12 هذا ووين اروح فيه ووين اقعد اذا حتى القاعات اللي نقعد فيها عشان التكييف يجون الامن ويطردوننا وين نروح يعني ومافيه ساحه وولا مكان نقدر نروح له هذا اسلوب تطفيش ومو قادرين نتحمله ..

واخيرا احب اهنيكم على حفل اليوم الوطني اللي كان عباره عن طاولتين ومسجل في احد الاسياب والممرات بصراحه جدا حسينا بالاستمتاع >> اول مره اشاهد حفل في ممر كان رائع