[align=center]
قبل أن ابدأ أحب أن أشكر كل عضو وكل قارء تم مروره على موضوعي المتواضع وإن شاء الله وجدتم فيه الشيء المفيد
نبدأ بالحلقة
الحلقة الثلاثون والأخيرة
الموقف الأول
يقول الرسول صلى الله عليه وسلم
(لعن الله الراشي والمرتشي والرائش الذي يمشي بينهما)
مره من المرات كنت امشي في حي السلام وبالقرب من مركز الدفاع المدني وفجأة أشوف رجال سعودي باين من لبسه أنه رجل برستيج وشبعان
المهم
كان يتناقش مع راعي لليموزين بخصوص سعر المشوار
وبعدين رفض ان يركب معه وبعدها جيت انا ووقفت قدامه
وقال لي : بكم توصلني لمستشفى العسكري ؟
قلت له : بـ 20 ريال
قال لي : والله ابرك من اللي قبلك
قلت له : ليش كم طلب منك ؟
قال لي : طلب مني 25 ريال ومع هذا سيارته ريحتها شينه أما انت لو تطلب 25 بوافق على طول عشان ريحت سيارتك تجذب ما شاء الله عليك
وبعدها ركب وبدأ النقاش بيننا في الطريق وكان بداية نقاشنا عن زحمة الرياض وعن شغل الليموزين وعن النظام سير المرور في المملكه العربيه السعودية
وقال لي : والله لو كل واحد فينا طبق أنظمة المرور بحذافيرها كان ما شفت الزحمه هذي
قلت له : والله انك صادق لانه بصراحه في دبي والبحرين تشوف الزحمه اكثر من عندنا بس تمشي تنتهي بسرعه لانهم يطبقون النظام على أصوله
المهم
وحنا في الزحمه جلسنا نسولف عن بعض الفساد الأداري اللي يصير في بعض الوزاراة وطعباً بقول لكم سالفه وحده ومختصره من ضمن السواليف اللي قالها لي
قال لي : يارجال عندك بعض الجهات الحكومية رايحه فيها من فوق لتحت
قلت له : وشلون ؟
قال لي : انا قبل اربع سنوات اجريت عملية زراعة كلية في الفلبين وعلى حسابي الخاص وانا في المستشفى جاني موظف من السفارة السعودية
وقال لي : كم خسرت على نفسك من أول ما وصلت للفلبين إلى اليوم
قلت له : بصراحه كلفتني الرحله من إلى بـ 280 ألف ريال
قال لي : طيب اكتب خطاب للدولة بتعوض المصاريف اللي دفعتها يمكن يكتب الله رزق منهم لانه المفروض الدولة تعالجك على حسابها الخاص
قلت له : طيب وش الإجراءات
قال لي : اكتب خطاب وأرفق معه صور من التقارير الطبية وصور من الفواتير المستشفى والسكن اللي انت ساكن فيه وصورة أثباتك أو صورة جواز السفر حقك وعطنيها وحنا من عندنا بنرسلها لوزارة الصحة
وأنت بعدها راجع الوزارة في السعودية وشف وش يصير معك
بعدها
لما رجعت للرياض جلست ثلاث شهور وبعدين راجعت الوزارة اللي فرعها بالقرب من سوق السمك اللي في حي المربع
وقلت لهم : ودي اشوف وش صار على معاملتي الخاصة بالتعويض
قال لي الموظف : يبي لها ثلاث شهور عشان تخلص
قلت له : يصير خير
وبعد ثلاث شهور راجعتهم وسألت عنها وبعدها
قال لي الموظف : بصراحه المعاملة ضاعت
قلت له : وشلون تضيع ياخي مايصير وش الأهمال هذا
بعدها
قال لي : عطني جوالك وإن شاء الله بحاول احصلها لك
ولما طلعت من عنده أتصل علي نفس الموظف اللي أخذ جوالي
وقال لي : بصراحة يالشيخ المعاملة موجودة عند بعض الموظفين وهي واقفه عليهم وعشان تمشي المعاملة لازم يبيلها شوي دعم
قلت له : وش تقصد بالدعم ؟
قال لي : بصراحه وعلى بلاطه يبيلها اقل شي 10ألاف دولار عشان نوزعها على بعضنا وبعدها تتحول للماليه عشان تاخذ فلوسك وأعتقد 10الاف دولار بنسبه لك مبلغ بسيط وانت بتاخذ شيك بـ 280 ألف ريال
بعدها فكرة الموضوع
وقلت له : خلاص مو مشكله بس متى تبي اعطيك الفلوس
قال لي : انا اتصل عليك ونتفق على الموعد
وبعدها اتصل علي
وقال لي : بجي لبيتك عشان ناخذ منك المبلغ
قلت له : خلاص أوكيه
بعدها جاني ومعه ورقه مكتوب أني انا تسلفت من المذكور مبلغ وقدره عشرة الاف دولار وها أنا اسدد الملبغ المستحق
وبعدين وقعت على الورقه وعطيته الملبغ وبعد اسبوع صدر الشيك من وزارة الماليه
بعدين انا
قلت له : طيب ما رحت تشتكي للمباحث الأدارية
قال لي : بصراحه كلمت واحد من أخوياي وهو نقيب في المباحث
وقال لي : يارجال احمد ربك ان المعاملة خلصت وهذا النظام عشان يمشي شغلك لازم تدهن السير
سبحان الله حاميها حراميها
بعدها
قلت له : طيب ياخالي هذي رشوه وشلون تقبلها على نفسك
قال لي : وش اسوي لازم أسوي كذا عشان امشي أموري
أخ خ خ خ خ خ بصراحه شي يقهر
وما ضيعنا غير الأشكال هذي
أسأل الله القدير بأن يغفر ذنب صاحب هذا الموقف
إنه غفور رحيم
الموقف الثاني
مره من المرات كنت أمشي في حي السليمانية وبالقرب من ملاهي الخيمة وفجأة أشر لي شاب لابس لبس محترم وملامح وجهه تحس انه ملامح واحد أمير بس سبحان الله الشكل من جهه وهو من جهه ثانية
المهم
قال لي : تكفى ابيك توصلني لسوق الفيصلية بكم ؟
قلت له : بـ 15 ريال
قال لي : والله العظيم ما معي غير 3 ريال
قلت له : معقوله كل هذا اللبس وهالشخصية ومعك 3 ريال طيب مو مشكله تفضل أركب
وبعدها وانا في الطريق جلست اطالع فيه بنص عين وأقول في خاطري وش اللي حدك تروح للفيصلية وأنت ما معك غير 3ريال
المهم
لما جاء ينزل للسوق عطاني 3ريال
قلت له : خلها لك يمكن تحتاج تشتري شي من الفيصلية بس أبيك تدعيلي
قال لي : بذمتك ما تبي تاخذها ؟
هههههههههههههههههههههه
قلت له : ايه
قال لي : الله يخليك ويوفقك يارب مشكور
بعدها انا جلست اطالع فيه وانا فيني شوي ضحكه ومستغرب من شكله لانه بصراحه ما صدق لما قلت له خل الفلوس لك
أسأل الله له الهدايه وان يصلح من شأنه إنه سميع مجيب
الموقف الثالث والأخير
مره من المرات وصلت لي عائل من سوق الأندلس اللي في شارع العليا إلى حي البديعه بالقرب من نادي الهلال
ولما نزلتهم رحت لسوق البديعه مول وركبت عائله من نفس السوق ولما ركبو معي
قالت لي واحده فيهم : يا أخ فيه جوال طيح تحت الكرسي الظاهر حق زبون كان معك
طبعاً انا أخذت الجوال وكان نوعه نوكيا (الدمعه)
المهم
بعد ما نزلت العائله اللي كانت معي اتصل من نفس الجوال على أخر رقم تم الاتصال عليه وردت علي حرمه
قلت لها : يا أختي أنا سائق لليموزين ولقيت الجوال هذا معي والظاهر انه طاح من أحد الزبائن إذا كان تعرفين صاحب الجوال أو أحد أقربائ صاحب الجوال عشان اتصل عليه واكلمه
قالت لي : ايه هذا جوال خويتي وسجل رقم أختها عشان تقدر توصلهم
بعدها أتصلت على أخت صاحبت الجوال
وقلت لها : معك سائق ليموزين انا اليوم لقيت جوال الظاهر انه لوحده من خواتك كان طايح تحت الكرسي الخلفي
قالت لي : أيه تكفا تفكا هذا جوال أختي الله يخليك جبه لنا تكفا لا يضيع الله يرحم والديك
وهي تكلمني حسيت اني لقيت لهم ولد ضايع وليس جوال
وبعدها رحت لبيتهم بعد ما وصفته لي ولما عطيتهم الجوال عطتني 100ريال
وقالت لي : والله ما تردني
قلت له : يابنت الناس هذا حقكم وما يحتاج تدفعون فلوس عشانه
حلفت لي بالله
وقالت لي : والله العظيم ما تردني تكفا خذ الـ 100 ريال
بعدها أخذت الـ 100 ريال وكنت مستغرب ليش كل هذا الخوف وهذا الرعب عشان جوال مفقود
بصراحه حسيت ان فيه صور خاصه لهم
لذا نصيحه لوجه الله لبعض النساء والعوائل
لا تصورون نسائكم بالجوال يمكن إاذا ضاع الجوال أو أنسرق بعدها تنتشر صوركم عن طريق الوسائط أو عن طريق الأنترنت
أسأل الله القدير رب العرش العظيم بأن يهدي ظال المسلمين إلى طريق الحق
إنه سميع مجيب الدعاء
ــــــــــــــــــــــــــــــــــــــــــــــــــ ـــــــــــــــــــــــــــــــــــــــــــــــ
وفي الختام
ما يدوم الا وجه الله سبحانه وتعالى
بدأت اكتب فيه هذا الموضوع في نهاية شهر رمضان عام 1428هـ وأنتيهت منه في شهر ربيع الثاني عام 1429هـ
ياما وياما جتني رسائل مكتوب فيها متى الحلقة الأخيرة ياعبرود وها أنا أرد على أصحاب الرسائل هذي وأقول لهم هذي الحلقة الأخيرة يلا أنبسطو
هههههههههههههههههههههههه
وبصراحه أنا من أول حلقه كتبتها ومن أول ما فكرت في كتابة الموضوع كنت متفق مع نفسي بأني اكتب ثلاثين حلقة فقط
لان المواقف كثيره جداً وأنا كتبت بعض منها واللي فيها فائده بإذن الله لانه بصراحه في بعض المواقف ما اقدر اذكرها لأن المثل يقول
(وما خفي كان أعظم)
وبصراحه لو الكراسي اللي في الليموزين تتكلم وتكتب كان قالت أشياء وكتبت أشياء يشيب لها الجبين بس نسأل الله الستر والعافية
بيني وبينكم الموضوع هذا استفدت منه أشياء كثيره وإن شاء الله أنتم أيضاً وجدتم فيه الفائده
أما بنسبة لي من أهم الفوائد اللي استفدت منها أني تعرفت على ناس كثير ومن مدن ودول كثيره وبألأخص أهل الأمارات وعلى رأسهم أبوعلي من أمارة دبي وراشد(ظبياني) من أمارة ابوظبي
وكذلك تعرفت على ناس من دولة الكويت وعلى رأسهم الكاتب حلم من منتدى بناء وأبوخالد من عاصمة الكويت وأبوناصر من منطقة الأحمدي
وكذلك تعرفت على بعض الطلاب اللي مبتعثين في كندا وعلى رأسهم عبدالله من منتدى الزعيم
وكذلك بعض المبتعثين في أستراليا وعلى رأسهم عبدالرحمن (صقار) وعبدالله ابوسامي
أسأل الله بأن ينجحهم في دراستهم ويرجعهم لأرض الوطن في أسرع وقت وهم سالمين وغانمين
وأما في السعودية فحدث ولا حرج بصراحه تشرفت بمعرفت ناس كثير ومن مدن كثيره لا استطيع ذكر أسمائهم بسبب كثرتهم وأتمنا من أي واحد وجد مني كلام جارح سواء عن طريق رسائل ألإيميل أو عن طريق الماسنجر بأن يسامحني وبالأخص الأخ اللي ساكن في حي الواحه
وقبل ما أنهي الحلقة ودي اقول نصائح للزبائن ونصائح لسائقين الليموزين
أولاً نصائح خاصة بزبائن الليموزين
1/ نصيحه لبعض النساء والعوائل لا تسولفون مع سائق الليموزين بكثره سواء كان اجنبي أو سعودي فقط تكلمي معه بخصوص العنوان اللي تبون توصلون له لانه بصراحه كثرة الكلام مع رجل غير محرم لك قد يصل إلى الحرام وقد يدخل الشيطان بينكم ويصل الحديث بينكم إلى تبادل بأرقام الجوالات
2/ لاتستحقرون سائق الليموزين ولا تتكبرون عليه لانه عنده أحساس وهذا الشيء يخليه ينقهر لذى نصيحه احسنو التعامل معهم لانه بصراحه فيه بعض الناس أخلاقهم قذره مع احترامي الشديد لزبائن الليموزين وينظرون لسائق الليموزين بنظرت كائن غريب
3/ لاتركبون مع الليموزينات اللي توقف أمام الاسواق الا إذا كانه رجل كبير في السن فما يمنع لانهم بصراحه سواقين الليموزينات اللي يقفون أمام الاسواق يطلبون مبالغ كبيره ومبالغ فيها وفي بعض منهم نواياهم سيئه والعياذ بالله
ثانياً نصائح خاصة بسائق الليموزين
1/ دايماً حط أعصابك في ثلاجة وخلها بارده ولا تهتم من كلام الناس اللي تصرخ عليك في الشارع أو يستحقرونك وانت واقف عند الاشارات
2/ دايماً خلك مبتسم مع الزبون وخلك بشوش عشان يرتاح لك وكمل جميل في المشوار وأحسن تعاملك معه سواء كان الزبون سعودي أو اجنبي ولا تستحقر الأجانب وبالأخص الهنود والفلبينيين والبنغلاديشيين
3/ وإذا ركب معك زبون اتبع الحكمه اللي تقول
لا أرى لا اسمع لا اتكلم وأكتم اسرار زبونك ولا تنشرها بين الناس لان الدنيا دواره يمكن يجي يوم وبتقابل الزبون ويوصل له الكلام اللي قاله لك عن طريق ناس ثانيه
4/ خل سيارتك دايم نظيفه وعطرها وانت بعد خلك دايم نظيف ومرتب عشان الزباين ترتاح لك وتطلب رقمك وتخليك توصلهم دايماً
5/ راعي ضروف بعض الزبائن في قيمة المشوار وبالأخص طلاب المدارس العوائل الفقيره والرجل الطاعن في السن
آ ه ه ه ه ه ه ه ه أخيراً خلصت
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـ
من أهم الحلقات التي كتبتها هي كما يلي
الحلقة الثانية
الحلقة السادسة
الحلقة التاسعة
الحلقة الثانية عشرة
الحلقة الخامسة عشرة
الحلقة السابعة عشرة
الحلقة الثالثة والعشرون
الحلقة الرابعة والعشرون
الحلقة الخامسة والعشرون
الحلقة السادسة والعشرون
الحلقة السابعة والعشرون
الحلقة الأخيرة
وإن شاء الله انتظروني في موضوع جديد وشيق بإذن الله
أسأل الله بأن يفرج هم كل من قرأ هذا الموضوع وأن لا يدع له ذنباً إلا وغفر له ولا ديّناً إلا وقضاه له ولا مريضاً إلا وشفاه له
إنه سميع مجيب
هذا والصلاة والسلام على اشرف الأنبياء والمرسلين سيدنا ونبينا محمد صلى الله عليه وسلم وعلى آله وصحبه أجمعين
والسلام عليكم ورحمة الله وبركاته
محبكم في الله وسائق الليموزين / عبرود[/align]
المواضيع المتشابهه
العرض العادي
