مجلس ابوسلطان

[ابو سلطان]

اقتباس يازين هالمجلس وياطيب سوالفك إسلم يا أبو سلطان مستمعين بإستمتاع

حي الله جوري

حياك الله بالمجلس

[ابو سلطان]

اقتباس حسيت إن جدي قاعد يسولف أحب السوالف القديمه خير وبركه أيام قبل ,, مستمتعين بسوالفك ..

حي الله شمس الوله
مدريت انك كارليس الا بعدين

حياك الله في المجلس

[ابو سلطان]

السلام عليكم ورحمة الله وبركاته

تصدقون اني اتعجب من افلام الكرتون اليابانيه

اللي يرسمون البنت اليابانيه بعيون كبار ماخذه نص الوجه

مع اني اعرف ان اليابانيات عيونهم صغار بس مدري ليش يخلونهم كبار

اتذكر اول الافلام الكرتونيه اللي كانت تجي بالتلفزيون الابيض والاسود

او تلفزيون ابو باب يتسكر الملون

كنت اتسمر عند التلفزيون علشان اطالع البرامج اللي كانت تبتدي الساعه التاسعه وتسكر الساعه الواحده ظهرا

وبعدين تفتح في العصر وتسكر في منتصف الليل

وكان عندنا قتاة الكويت والقناة السعوديه فقط

والانتل حق التلفزيون كنا نفره باليد او بالبايب رينش - ابوجلمبو -

وكنت اصيح علي اخوي سعيد صفا التلفزيون او افر بعد

سقي ذيك الايام

[ابو سلطان]

السلام عليكم ورحمة الله وبركاته

علي طاري الحر كان عندنا مكيف صحراوي

كنا كل فترة نغير القش حقه ونعبيه مويه علشان يبرد

وبعدين شرينا المكيفات الفريون

بس كانت الكهرباء دايم تنطفي في البيت

ونجلس بوسط الحر والعرق يتصبصب مني

وكان عندنا مهفه من الخوص يازينها اذا اشتد الحر استخدمها واحس ببروده حللللوه

[ابو سلطان]

تصدقون كان عندنا العاب شعبيه كثيره

وسبحان الله كل موسم له لعبه

كانت كرة القدم هي اللعبه المحببه لي وبعدين حي الميد او هريبه

او المقصي وهي عباره عن عصاة كبيره نضرب بها قطعة خشب صغيرة

وحنا واقفين بوسط الدائره

وكان عندنا لعبة واحد طيش

ولعبة التيل والعابها الكثيره منث الطنب والدقي والعروس

وكان كل لون لها قيمه

مثل الكاكاوي تكسبه بضربتين والمائي باربع ضربات والصيني بخمس ضربات

وكان عندنا النبيطه بس سبحان الله كنت اكرها لاني كنت اخاف منها

اما البنيات كان يلعبن شبرا امرا شمس نجوم

ويلعبون الحجله او لعبة انا الذيب باكلكم وانا امكم بحميكم

او يلعبون حريم


سقي الله

[ابو سلطان]

ههههههههه

مدري منت احب النكت

وكنا دايم ننكت علي جحا

وكل شوي نقول في مرة جحا وفي مره قال جحا

وبصراحه كنت خجول وساكت

اهم شي انك اذا طلعت من البيت

مايجي اذان المغرب الا وانت محضر في البيت واذا تاخرت ياويلك ياسواد ليلك

احصل الوالد الله يرحمه يستناني

وين كنت وووين رحت وليييييش متاخر

وتاخذ لك كم طراق علي كم سبه من سبة الشيبان اللي قبل وبعدين تروح تنام
وتجي الوالده الله يحفظها وتقومني من النوم تقول قوم ياعبدالله كل حاجه انت ماتعشيت

الله يرحم الوالد ويحفظ لنا الوالده

[ابو سلطان]

السلام عليكم ورحمة الله وبركاته

زمان يالربع الكبير نكن له كل تقدير واحترام وله الهيبه والحشيمه

اقسم بالله ان مر علينا احد الرجاجيل اوالشيبان وحنا نلعب انا كنا نوقف حتي يعدي واذا تكلم علينا احد الشيبان فاننا نلتزم الصمت او نهرب

اما اليوم يالربع اقسم بالله ان الواحد ما يعدي من طريق فيه بزران خوفا من السفاهه والحذف
واذا نهرت الواحد قام يغلط عليك ويمكن يهاوش وهو بعمر اولادك

الزمان هذا ضاعت فيه النخوه والمروة والتقدير للجار وللشايب وللطفل الصغير

[أبو رائد]

يا هلا والله بـ أبو سلطان

ويازينك ويا زين سوالفك ..


استمتعت بقراءة ما تكتب

وبإذن الله بكون متابع لهذه الذكريات الجميلة

والله يوفقك ..

[شمس الرائدية]

والله سوالفك ما تنمل .. وفيها من واقعي
الله يعطيك الصحه والعافيه ..
قبل كنا نستنى لما تفتح القناة .. كنا نمد رجولنا ع الكبه ونستنى القرآن والنشيد الوطني ..
وبعدين رسوم باباي وبيب بيب وبعدين سالي أو هادي ..
ياحلوووه من آيام ..,,
ونفس حالتنا واحد بالسطح يحرك الشبكه و واحد عند التلفزيون ( صراخ صفى التلفزيون . طلعت القناه ) والمسكين اللي فوق يجي ضاربته الشمس
طبعا .. الموضوع سوالف لابو سلطان وأنا ماصدقت قمت أهذر

[فهدالقحطاني]

هلا وغلا


ابو سلطان

مجلس رائع وانا ساكون من رواد المجلس والسوالف الحلوة