دبلوماسي
مطولك يابالي ويا قو باسي
والصبر للأنسان مافيه غيره
صدّع من افواه الغشيمين راسي
ناسٍ تحرّف بالكلام وتثيره
كلٍ على كيفه محلل سياسي
راحت سوالفهم سمير وسميره
والطاوله في عرض وجه الكراسي
يامربعه والا تجي مستديره
وانا على وضح النقى دُبلوماسي
ودي يصير الخير في كل ديره
موسم ربيع وفيه موسم دراسي
لي موسم الصقار لاهد طيره
واشري فْراق اللي يدور عماسي
والقى العوض خوّة وجيهٍ سفيره
مااشغلت نفسي بالفتن والمآسي
مااسمع عَربيه ولا اسمع جزيره
والريح ماهزت جْبالٍ رواسي
لاضاع مسّاك الخطام وبعيره
واصل الذهب يفرق عن اصل النحاسي
يانحاس لامذهب ولا لك عشيره
لولا مقامي عند عارف مقاسي
لاقول لكن دايم الصمت خيره
المواضيع المتشابهه
العرض العادي
