كلي .. هنا .. نــواف ... !

[نواف الفهاد]

الفقر فالبُعد عن رب الخلايق ،
و السنين تمرّ والأحلام كومه ،

والله إني كل ماصلّيت رايق ،
لو تشحّ بمالها بنوك الحكومه ..!!

[نواف الفهاد]

مجهود جميل وجدته بالصدفة باليوتيوب الله يجزاه خير اللي قام فيه و ممتن له كثير !

.. http://www.youtube.com/watch?v=nV1lPUbZDYQ

[نواف الفهاد]

واحد وفي بالغلا يدنيك ،
يكفيك عن حظك الشاقي ،

أحيان صملة بشر تغنيك ،
عن ألف واحد من الباقي ..!!

[نواف الفهاد]

لايكثر الهرج قصّرها وأنا خيّك ،
وأحذر من أوهام عمرك لاتجي صوبي ،

ياكثرهم قبل أشوفك بالزمن زيّك ،
ماطيّحوا لي مكان وحافظ أسلوبي

[نواف الفهاد]

لو يضيق الكون ياوسع المحاني ،
داخلي بيت و جعلت الصبر سقفه ،

كثّر الله خير من صدّ و نساني ،
صرت أوقّف ما أبي للناس وقفه ..

[نواف الفهاد]

بيتن كتبته من الوجدان ،
مسموح للي قرأ يذيعه ،

لا تزرع الحلم وسط إنسان ،
ترجع بعد فترة تبيعه ..!!

[نواف الفهاد]

يا رب وإن باروا الغالين ،
و أرخصني الناس بالشدّة ،

أرزقني الصبر فوقه لِين ،
لين أقنع القلب بالصدّة ..

[نواف الفهاد]

مشيت و آخر دروبي كان يشعل حريق
و كانت خطاوي سنيني تشبهن جامحه ..

كان بيميني فريق و في يساري فريق ..
و ناس تنفض يديها .. لمقتلي طامحه

مشهد حقيقه يخوّف و لعيوني بريق ..
نفسي من الناس كلّه طابت و سامحه

لمحت شخص و ذكرته كان يشكي غريق ...
شلته و غلطة خفوقي ( الله يسامحه ) !!

كان أكثر اللي يبي طعني و رمحه زريق ...
و أنا أسأل سنين عمري وين أنا لامحه ؟!

و تركت عقبي قناعة يوم ضاق الطريق ...
كم من خطأ زاد شرّه و السبب دامحه ..

أقدمت يمّ الحريق و ثار فيني حريق ...
( و أياة واحد خذلني ماني مسامحه ) ..!!

[نواف الفهاد]

شف أنا لا أخطيت يالمحبوب قلّي ،
لا تخلّيني أنا ماني بكامل ،

نصّ أخطاء المحبة بالتغلّي ،
و نصّها الثاني بجاملني و أجامل ..!!

[نواف الفهاد]

أكتب عن جروح وقتك قدّ ماتقدر
.. ولآ تحسب إني عن اللي تكتبه سالي !!

تركتني للغياب الموحش الأقشر !
.. و تركتك لـ ( غلطة التفريط بأمثالي ) !!