كلي .. هنا .. نــواف ... !

[نواف الفهاد]

مالهم عقب الألم عندي أمان ،
ليت ذاك القلب بإحساسه بخل ،

كلهم خانوا / و عذري بالزمان ،
قلت فرّقهم و هو ماله دخل !!

[نواف الفهاد]

مالي على ردّ المخاليق سلطه ،
و مقدر على بكره ولا أقدر على أمس ،

إذا إنتظار اللي يغيبون غلطه ،
الناس وش به تنتظر طلعة الشمس ؟!

[نواف الفهاد]

قلبي نخاهم ما أنتخو ،
نخا / نخا / نخا / نخا ،

اللي أعدّه لي أخو ،
واللي عليه أسخي سخا ،

راحو وصوتي مو / رخو ،
يقطعك ( صدقان الرخا ) !!

[نواف الفهاد]

مالحقني شكّ في داخلك ساكن
................ بس أنا خايف تغيّرك الظروف !!

كلهم قالوا مثل ماقلت .. لكن ..
............. كلهم راحو و أنا عيني تشوف !!

[نواف الفهاد]

لا عاش رجلٍ يرخي الراس لا عاش ،
و يا هقوتن في أوسط القلب فيقي ..

تكشف لك الدنيا صديقٍ على ماش ،
و تعرف مواقيف الصديق الحقيقي !!

[نواف الفهاد]

يا طعون الجريح اللي مخاوي جريح ،
ودّه إنه يفضفض ودّه إنه حكى ،

لا هو اللي مريح ولا خويّه مريح ،
كل ماقال جرحه شاف خلّه بكى !!

[نواف الفهاد]

خطّ الجبيل و مدخله والفناتير ،
وأيام لا تنسى و أنا ساكن بــ نجد ،

أشياء كثيرة تجرح البال و تثير ،
قلبٍ ملاه الشوق والحزن والوجد !!

[نواف الفهاد]

أنا و قلبي و الزمن حربنا ضروس ,
و مافاد به حرصي ولآ فاد حرصه .....!!

ياكثر .. ماوقتي عطى قلبي دروس ,
وأقول ياقلبي عط الناس فرصه ........!!

[نواف الفهاد]

الإغتراب .. شخصٍ سكن بك ثم غاب !!

[نواف الفهاد]

أبطى البريد ومالقى الظرف ساعيه ,
قلت أختصرها والكتابة بــ خطّي ..!!

المال كآنه مارفع ذكر راعيه ,
...... ما ودّك أنه للمراجل يوطّي ..!!