السلام عليكم ورحمة الله وبركاته
يانخيل البطِين اللي تقاطـر عذوقـه
يا ظلال الغصون اللي قراح(ن) تسقّا
المخيل العريض اللي تلامـع بروقـه
ماحد(ن) فادنا عن ماطره وين لقّا ؟
من يربّي على العليا طبايـع لحوقـه
ما يهاجم ضعيف(ن) في يدينه تتقّـا
الاناني حسود(ن) والمطامع تسوقـه
وان حصل له تُوقّي جلد غيره توقّـا
كل طير(ن) ولوكانت عزومه تشوقه
مرجعـه للثـرى لـو للثريّـا ترقّـا
رغبة(ن) قوتها في كل حين(ن) تذوقه
خير من رغبة(ن)ترقب عشَي(ن)مبقّا
يُهدر المال في سوق(ن) يخلاّ سروقه
ولا يُذاق اللبن من درّ ذود(ن) منقّـا
تاجر القافلة من يوم ضاعت حقوقـه
ماحد(ن) ناشـده عن حاجـة المستحقّـا
ما يقوم البعير اللـي حمولـه تفوقـه
لو نخا هقوته ماهي مثـل مـا تهقّـا
تنتهي طاقته وأيّات شـي(ن) يعوقـه
ولا يدارب على الصعبات غير المشقّا
ولا يفيد اللباس اللي وساع(ن) فتوقه
كلما خِيط شقّ(ن) بان تسعيـن شقّـا
كل نوّ(ن) يكـون الله فوقـك وفوقـه
وكل مسمار باقي فوق راسـه مطقّـا
المواضيع المتشابهه
العرض الشجري