حتى على الاحلام .. تبي تعصاني
بقلم الشاعر / نفاع العنزي *
أمانتك .. إذا بغيتي تنامين
يدور بالخفاق .. وينه مكاني ؟
وإلا ليا جيتي على النت تقرين
ما هز وجدانك .. بلاغة بياني ؟
أنا انجرحت بغيبتك قبل شهرين
ويا كبر خوفي بنجرح جرح ثاني
لحظة نسيت أقولك .. قبل يومين
حلمت فيك .. وهز حلمي كياني
كان العطر ينعش يباس الشرايين
وكان الغلا غيثٍ .. يبل المحاني
كان اللقا صمت وكأنك تقولين
اشرح بصمتي .. مفردات المعاني
كنتي حزينة تلمحيني وتبكين
وكان الأسى يقهر طموح الأماني
مدري دموع الهجر .. وإلا تغلين
بس الوكاد .. إنك حزينة عشاني
واذكر بعد همست لك .. لا تغيبين
لا أنتي أنانية .. ولاني أناني
كان اللقا رغم الأسى بوح روحين
عاشن مع الأحلام .. عمر الثواني
وصحيت من حلمي على الواقع الشين
وحسيت بآهاتي .. تعاتب زماني
كانت معي يا وقت بالحلم مشوين
هنا .. هنا طيف المحبين جاني
وهالحين وين الحلم يا واقعي وين ؟
حتى على الاحلام .. تبي تعصاني
شفتي زماني .. زود الجرح جرحين
جرحي القديم .. وواقعي جرح ثاني
1 ping