بالصوور حميسة لحمم حآشي + لقطة الختام ..!!

[عشق الشمال]

السلام عليكم


أسعد الله أيامكم ولياليكم وكل أوقاتكم


اليوووم بعد تفكير عمييييق قررت أغير النظام الغذائي عند العزاب


مايعرفووون بحياتهم شي .. غير الكبسة ( رز أبيض + ودجاج مسلوووق + وملح )


قلت أبي أسووووي فيهم معرووف وأونسهم شوووي .. وأعيشهم جو العوايل


جبت لحم حاااااشي .. وبديت أعيش الأجواء الطبخية .. قلت أخليكم تعيشونها معي حتى أنتم ..


نبدأ بالمقادير ياقلب العنا ..


1_ لحمة حاشي مقطعة ومغسوووولة


2_ بصل روووس وبندووور


3 _ بهار مشكل << حسب الرغبة


4_ ماجي أبيض << موجود بالمطبخ وحطيته مدري يصلح وإلا ما يصلح ..!!


5_ صلصل ( يفضل اللي بالقواطي ) وإذا مافي أبوكرتون زين


6 _ فلفل أسووووووود << لا تكثرووونه


7 _ ملح


8_ فلفل أخضر بااااااارد مقطع قطع صغيرهـ << انتبهوا فيه بعضهن يكون داخلها دوود ( دوده من عودهـ )


صووورهـ جماعية للمقادير

7
7






نجي لطريقة الطبخ والنفخ ..


* نجيب اللحمة .. نحطها بالقدر بدووون زيت .. مثل كذا








بعدين ناخذ البصل والبندووور والفلفل الأخضر .. نحطهن فوووق اللحمة






بعدها ناخذ البهار والصلصل والماااجي الأبيض << والله أحس ماله داعي الماجي

نرميهن فوووووق خوياتهن ..









بعد ماحطينا المقادير على بعض .. نقوووم بخلطهن بملعقة الخشب






طبعآ هنا .. لازم نكون مجهزين مووويه فايحة عشان على طووول يغلي بالقدر ..





الحين نكتم القدر بإحكاااااااام .. ونركده على الناااار قوووية حيل


إذا بدأ يقووول تس تسسس تسسسس .. نحسب له عشر دقاااايق .. بعدين ننخفف عليه الناااار شووووي ( الله يجيرنا منها )


نخليه على هالحاااااال لمدة نصف ساااعة تقريبآ .. ونطفي النااااااار ثم نشيل ( الصفيرهـ ) ونخليييييه لما يخلص البخاااار


واللي يفتح القدر قبل يخلص البخااااار .. يتحمل النتايج


خلص البخار .. فتحنا القدر .. وكاااااانت النتيجة الفتاكة





نجفاااه بالصحن .. ونقوووول بسم الله ,, وهني وعاااافية





ترى تنسيق السفرة يفتح الشهية






لقطة الختاااااااام


7

7






































اللومية المعلقة بين سقف المطبخ والقدر





إذا شلتوا صفيرهـ الكاتم .. هاتوا حبة اللووووومي .. حطوها فوق البخاااااار



في أمان الله ،،

[سـَمآ ♪]

اقتباس ماجي أبيض << موجود بالمطبخ وحطيته مدري يصلح وإلا ما يصلح

زين بس ماتكثرمنه يعطي نكهه غريبه بالطبخ,,



ماشااء الله..
يااسلام حميسة لحم حااشي..
تسلم الايااادي..

وعليكم بالعافيه,,

بأنتظار جديدك.المطبخي..

[شوق الغلا]

تسلم يالغلا

طبخه ولا ارووووووووووووووووع

تجنن وعليك بالعافيه

نجربها بــ عيد الاضحى

الماجي الابيض يسبب ليونه بالعظام موب لازم كافي علينا العشااشه

كُن باحسن حال

[دانة الكون]

ماشاء الله عليك
رووووووعه
الله يسلم الايادي
كسبت بهم اجر
بس لاتكثر الماجي الابيض

الله يعطيك العافيه .

[الراهي]

..
>>
يا رباااااااااااااااااهـ
حميسة ومن عشق الشمال
عز الله إنهم ما ناموا هـ كـ الليلة
والصورة الجماعية لـ المقادير
شئ ههههههههههههههههههههه
و
وبعدين إنت تقول نخلط المقادير
بـ ملعة خشب
ونشوف بـ الصور ملعقة حديد
< كذا ضيعتنا
.
.
وصح لا تكثر من الماجي
تراه مهو زين
< تراني ما شفت اللّي ردوا فوقي
وعز الله إنه أحلى تنسيق
تنسيق السفرة
..
.
ويا سلام على حركة الليمونة
شئ .. بس ينفع نحط تيلة
.
.
والله يجزاك خير
كسبت بهم أجر
وعافاك الله على الموضوع
الرائع والمميز
..
.

[العالمي]

بس يقولون ان لحم الحاشي له ( زفره ) يعني لازم يغلى بماء لمده نص ساعه ثم

تغسل اللحم والقدر زييييين وبعدين تبدأ الطبخ من اول وجديد

هذا على قولتهم انا ماعندي اي معلومه

[عاشق القمم]

* والله شيء ..
تسلم يا .. عشق الشمال ....!!
وكثر من .. هالطبخآآآآآآآآآآآآآآآآآآآآآآت .....!!

[شمس الرائدية]

.

حاشي < الله يديم النعمه
بس
ما شاء الله / تبارك الله
فنان في الطبخ
وسفره دائمه إن شاء الله ..’’

[عشق الشمال]

اقتباس المشاركة الأصلية كتبت بواسطة شذى الايام زين بس ماتكثرمنه يعطي نكهه غريبه بالطبخ,, ماشااء الله.. يااسلام حميسة لحم حااشي.. تسلم الايااادي.. وعليكم بالعافيه,, بأنتظار جديدك.المطبخي..

حي الله شذى الأيام

أجل المرة الجاية نكنسل الماجي كله .. مالنا به غرض

الله يعافيك .. وألف شكر على تعليقك ،،

[عشق الشمال]

اقتباس المشاركة الأصلية كتبت بواسطة شوق الغلا تسلم يالغلا طبخه ولا ارووووووووووووووووع تجنن وعليك بالعافيه نجربها بــ عيد الاضحى الماجي الابيض يسبب ليونه بالعظام موب لازم كافي علينا العشااشه كُن باحسن حال

الله يسلمك ويعافيك

تسلمين على حضورك وتعليقك ..

نزلي الصور إذا جربتي بالعيد