[poem=font="Simplified Arabic,5,black,normal,normal" bkcolor="" bkimage="" border="none,4,gray" type=2 line=200% align=center use=ex length=0 char="" num="0,black" filter=""]
قبل أمس أنا وياك نلعب على الطين = وأحلامنا قبل أمس كانت تشابه
أطفال كنا .. بس كنا مجانين = ما فيه شيٍ بالوسيعة نهابة
كنا صغار ولا نحسّب لبعدين = بعدين .. والله ما حسبنا حسابه
ايامها .. والقلب ما ياسع ثنين = كنتي فرح عمري ولا هي غرابة
كنتي بعيني غير كل الملايين = أحسك أقرب من جميع القرابة
أشوفهم في عين .. وأشوفك بعين = أيوووه يا ذاك الغلا ينحكابه
نعيش حاضرنا وكنا سعيدين = نرضى بواقعنا ولو هو خرابة
هذا مع انا صغار كنا على الدين = نضحك على همال دمع السحابة
كنتي على انغام الربابة تنامين = وأنا .. يصحيني .. ونين الربابة
واليوم حنا وين ؟ وأحلامنا وين ؟= لو شافنا (قبل أمس) زاد اغترابه
(قبل امس) هذا.. موّت سنين وسنين = وحلمٍ يموت .. وحلم ثاني شقابه
تدرين وش عمر الزهر بالبساتين؟ = مثل الفرح .. لا شاف هم الكآبة
جيت أربعيني.. وأحسبها ثلاثين = شيب شبابي.. ما اهتنا في شبابه
والله وشيبنا.. وشابت قوانين = وماتت ثوابت حلمنا ..وسط غابة
ورغم اختلال معادلات الموازين = وطيش القلم في مفردات الكتابة
تبقين في خفاق نبض الشرايين = وأبقى على عهدٍ .. لبستي ثيابه
وسرٍ كتبنا مفرداته.. على الطين = في ذمتي .. ما فيه حيٍ درابه
[/poem]