[poem=font="Simplified Arabic,5,black,normal,normal" bkcolor="" bkimage="" border="none,4,gray" type=2 line=200% align=center use=ex length=0 char="" num="0,black" filter=""]
هات الدلال وجيب ذيك المعاميل = ما يستوي مجلس بلا بن ودلال
يطرب شفاة القلب صوت الفناجيل = ويذهب اعماس الراس يا شيخ فنجال
قم ثقل الحمسة وقلل بها الهيل = واحرص عليها حيل يا طيب الفال
وخل الكلام وخل عنك الأقاويل = وقرب وسولف يا بعد كل من قال
إن كانها بالمجد شمر حلاحيل = وإن كانها بالطيب ما مثلك رجال
قرب .. تعال أقول لك شي ما قيل = أبا أبدعه هالحين واضرب به أمثال
حمدي .. أنا خاويت مثلك رجاجيل = لكن بطيبك !!! ما أعتقد شفت رجَال
طيبك تعدى الجيل الأول وهالجيل = يعني !!! فلا تلحق على طيبك أجيال
مالت رجال .. وشام راسك عن الميل = ومالت جبال .. وراس حمدي فلا مال
وأنا صديقك في زمان الغرابيل = ماني صديقك بس .. لا زانت الحال
خذني وشكلني على الكيف تشكيل = خذني وشكلني على كيفك أشكال
في ذمتي لاصير شمعة وقنديل = وظلال عن قيظك وعن حامي اللال
خذني مطر قاعك .. وشفني كما السيل = وخذني ذخر مالك .. إذا شح بك مال
خذني على يمناك .. واضرب بي الويل = وشفني .. لغارات الزمن عنك خيَال
خذني .. ذخر وقتك وذخر المقابيل = وخذني .. فخرعمرك .. ولك تاج وعقال
وسولف لهم .. عن صاحبك بالتعاليل = قل كان واحد .. بس عن عشرة رجال
[/poem]